افغانوں کا ’پہلا‘ فٹبال میچ افغانستان کی فٹ بال ٹیم نے ملک میں طالبان کے خاتمے کے بعد پہلی مرتبہ کسی عالمی مقابلے میں شرکت کرتے ہوئے ترکمانستان کے خلاف میچ کھیلا ہے۔ البتہ افعانستان کی ٹیم یہ میچ جیت نہیں سکی۔ افغان ٹیم کے لئے یہ میچ سن دو ہزار چھ کے عالمی فٹ بال کپ میں شرکت کا اہل ہونے کے لئے ضروری تھا۔ یہ میچ ترکمانستان کے دارالحکومت میں کھیلا گیا جس میں ترکمانستان نے افغانستان کو صفر کے مقابلے میں گیارہ گول سے شکست دے دی۔ طالبان کے دورِ حکومت میں مردوں کو نیکر پہننے اور فٹ بال کھیلنے کی اجازت نہیں تھی۔ طالبان عہد ہی میں پاکستان کی فٹ بال ٹیم نے افعانستان کے حکام کے ساتھ بات چیت کے بعد ایک دوستانہ میچ کھیلنے کا فیصلہ کیا اور یہ ٹیم افغانستان چلی بھی گئی۔ تاہم جونہی کھلاڑی روایتی نیکر پہن کر میدان میں اترے طالبان پولیس کے حکام اور دیگر اہلکاروں نے پاکستانی کھلاڑیوں کے خلاف کارروائی شروع کر دی اور جواز یہ پیش کیا گیا کہ فٹ بال اور اس کو کھیلنے کے لئے پہنا جانے والا لباس دونوں ہی غیر اسلامی ہیں۔ پاکستان کے کھلاڑیوں نے طالبان اہلکاروں کے تیور دیکھتے ہوئے میدان سے فرار ہونے میں عافیت سمجھی اور کابل میں پاکستانی سفارت خانے میں پناہ لے لی۔ تاہم بعد میں طالبان حکومت کے ایک اعلیٰ اہلکار نے پاکستان سے معذرت کر لی تھی۔ طالبان دور کے بعد رفتہ رفتہ افغانستان میں کھیلوں اور فنونِ لطیفہ کا رجحان بڑھتا جا رہا ہے۔ | 
یہ صفحہ دوست کو ای میل کیجیئے
پرِنٹ کریں
