یہ صفحہ دوست کو ای میل کیجیئے		پرِنٹ کریں

جاوید اور عامر کے ماضی میں اختلافات رہے ہیں

پاکستان کرکٹ کنٹرول بورڈ کے چیف سلیکٹر عامر سہیل اور ٹیم کے کوچ جاوید میانداد میں نیوزی لینڈ کے دورے کے دوران ٹیم کی سلیکشن کے بارے میں شدید اختلافات پیدا ہو گئے ہیں۔

پی سی بی کے سلیکٹر عامر سہیل نے بی بی سی ہندی سروس سے بات چیت کرتے ہوئے کہا کہ سلیکشن کمیٹی کا کام ایک معیاری ٹیم سلیکٹ کر کے کوچ اور کپتان کو دینا ہے اور کوچ اور کپتان کا کام ان سے بھرپور کارکردگی لینا ہے۔

جاوید میانداد کا وسیع تجربہ ہے

انہوں نے کہا کہ ٹیسٹ میچ سے پہلے سب کی مرضی معلوم کر لئی گئی تھی اور نیوزی لینڈ کے دورے کے دوران ٹیم کی سلیکشن اسی عمل کا تسلسل ہے کوئی نیا اقدام نہیں۔

تاہم جاوید میانداد نے عامر سہیل کے بیان پر تبصرہ کرتے ہوئے کہا کہ پی سی بی میں یہ طریقے کار طے شدہ ہے کہ تمام لوگ مل کر ٹیم کا فیصلہ کرتے ہیں۔ انہوں نے کہا کہ سلیکشن میں کوچ اور کپتان کی مرضی شامل ہوتی ہے کیونکہ ساری ذمہ داری ان کی ہوتی ہے اور خراب کارکردگی کی صورت میں انھیں ہی جوابدہ ہونا پڑتا ہے۔

انہوں نے کہا کہکرکٹ میں ان کا وسیع تجربہ ہے اور وہ چاہتے ہیں کہ اس تجربے سے ملک کو اور کرکٹ کو فائدہ ہو۔

عامر سہیل پاکستان کےاوپنگ بلے باز رہے ہیں

جاوید میانداد نے دبے دبے الفاظ میں کہا کہ اگر سلیکش کمیٹی کا یہی رویہ رہا تو انھیں سوچنا پڑے گا۔

انہوں نے کہا کہ یہ سب معاملات کرکٹ بورڈ کے چیئرمین توقیر ضیاء کے سامنے رکھے جائیں گے۔ کرکٹ بورڈ کے چیئرمین آجکل آئی سی سی کے اجلاس میں شرکت کے لیے دورے پر ہیں اور ان کی واپسی پر یہ معاملہ ان کے سامنے رکھا جائے گا۔