یہ صفحہ دوست کو ای میل کیجیئے		پرِنٹ کریں

عبدالرشید شکور لاہور

انضمام الحق اور گراہم سمتھ کی ٹیموں کے درمیان سخت مقابلے کی توقع ہے

کسی بھی سربراہ مملکت جیسی سکیورٹی میسر آنے کے بعد جنوبی افریقہ کی کرکٹ ٹیم بدھ کو سٹی ناظم الیون کے خلاف پاکستان کے دورے کا پہلا میچ کھیلنے قذافی اسٹیڈیم لاہور میں اتری تو سینکڑوں اسلحہ بردار کمانڈوز اور پولیس جوانوں کی موجودگی میں پاکستان کرکٹ بورڈ کا ہیڈ کوارٹر کسی حساس فوجی تنصیب یا ہیڈ کوارٹر کا نقشہ پیش کررہا تھا جنہوں نے اسٹیڈیم کو اپنے حصار میں لے رکھا تھا۔

گلبرگ پولیس کے اے ایس پی محمدعلی نے بی بی سی کو بتایا کہ یہ میچ تین اور پانچ اکتوبر کو ہونے والے دو ون ڈے انٹرنیشنل میچوں کی فل ڈریس ریہرسل بھی ہے۔

جنوبی افریقہ کی ٹیم کی حفاظت کا جو پلان تیار کیا گیا تھا ہر چیز اس کے مطابق ہورہی ہے۔ انہوں نے بتایا کہ وارم اپ میچ کے لئے مجموعی طور پر دو ہزار پولیس والوں کی ڈیوٹی لگائی گئی ہے۔ چونکہ ان کے ماتحت تین تھانوں گلبرگ نصیرآباد اور مین مارکیٹ میں نفری زیادہ نہیں ہے لہذا دوسرے تھانوں سے پولیس طلب کرنی پڑی ہے۔

قذافی اسٹیڈیم کےچودہ اسٹینڈز ہیں۔ وارم اپ میچ کے موقع پر اس کے ہر اسٹینڈ میں بیس پولیس جوان بٹھائے گئے تھے۔ اسٹیڈیم کے بقیہ حصوں میں بھی جوان تعینات کئے گئے تھے۔ اسٹیڈیم کے باہر بھی پولیس کی بڑی تعداد موجود تھی جبکہ ایلیٹ پولیس کے اسلحہ بردار کمانڈوز ڈریسنگ روم کے باہر مستعد کھڑے تھے۔

پاکستان کرکٹ بورڈ کے جنرل منیجر کرکٹ آپریشنز ذاکرخان نے بی بی سی کو بتایا کہ یہ تمام حفاظتی انتظامات صرف جنوبی افریقی ٹیم کے لئے ہیں اور شائقین کو اس سے خوفزدہ ہونے کی ضرورت نہیں۔

انہوں نے بتایا کہ دونوں ون ڈے انٹرنیشنل میچوں کے لئے تمام ٹکٹ فروخت ہوچکے ہیں اور انہیں یقین ہے کہ شائقین کرکٹ کا بھرپور لطف اٹھائیں گے۔

یونائیٹڈ کرکٹ بورڈ آف ساؤتھ افریقہ کے صدر رے مالی بھی ٹیم کے ساتھ پاکستان آئے ہوئے ہیں۔ وہ دورے میں ہونے والی تاخیر کے فیصلے کو درست قرار دیتے ہوئے کہتے ہیں کہ سکیورٹی ان کی اولین ترجیح ہے۔ انہوں نے کہا کہ جنوبی افریقی کرکٹ بورڈ کا کراچی میں نہ کھیلنے کا فیصلہ انٹیلی جنس رپورٹس کی بنیاد پر کیا گیا۔

انہوں نے سکیورٹی کے خدشات کے پیش نظر دوروں کی منسوخی کے ضمن میں آئی سی سی کے فورم پر قانون سازی کے بجائے ایسا طریقہ کار وضع کرنے پر زور دیا جس میں کھلاڑیوں کی حفاظت کو یقینی بنایا جاسکے۔

جنوبی افریقہ کی کرکٹ ٹیم کے کپتان گریم اسمتھ کا کہنا ہے کہ وہ پاکستانیوں سے خوفزدہ نہیں بلکہ بم سے خوفزدہ ہیں۔ انہوں نے کہا کہ پاکستان آنے کے بعد اب ان کی توجہ پاکستان ٹیم کو شکست دینے پر مرکوز ہے۔