یہ صفحہ دوست کو ای میل کیجیئے		پرِنٹ کریں

کوہ پیماؤں کو مہم جوئی میں خطرات کا سامنا رہتا ہے

بھارت میں واقع ہمالیہ کے پہاڑی سلسلے کی ایک چوٹی پنچاچولی پر آنے والے شدید برفانی طوفان کے باعث سات کوہ پیما ہلاک ہوئے ہیں اور مقامی حکام کے مطابق دو کوہ پیما لاپتہ بھی ہیں۔

حکام کے مطابق کوہ پیماؤں کی نو رکنی ٹیم سنیچر کی صبح اس وقت لا پتہ ہو گئی جب وہ چھ ہزار نو سو میٹر بلند چوٹی کامیابی سے سر کر کے اپنے بیس کیمپ کی طرف لوٹ رہی تھی۔

یہ واقعہ چین سے ملحقہ بھارت کی شمالی ریاست اترانچل کے ضلع پیتھوراگڑھ میں پیش آیا۔

حکام نے بتایا ہے کہ بھارتی فضائیہ کے امدادی ہیلی کاپٹر لاشوں کی نشاندہی کرنے میں کامیاب ہو گئے لیکن خرابیِ موسم کے باعث لاشیں واپس نہ لا سکے۔

چین کی سرحد پر تعینات بھارت کے نیم فوجی دستے (آئی۔ٹی۔بی۔پی۔ایف) کے آر۔سی اگروال نے بھارت کے ٹی وی چینل اسٹار نیوز سے گفتگو کرتے ہوئے کہا کہ ’ہم نے سات لاشوں کی نشاندہی کی ہے جن میں سے چار کی شناخت کر لی گئی ہے‘۔ تاہم لاپتہ ہونے والے دو کوہ پیماؤں کی تلاش ابھی جاری ہے۔

حکام کا کہنا ہے کہ یہ تمام کوہ پیما آئی۔ٹی۔بی۔پی۔ایف میں فرائض انجام دیتے رہے ہیں اور وہ دشوار گزار پہاڑی راستوں کے ماہر بھی تھے۔

ان میں سے تین کوہ پیما دنیا کی بلند ترین چوٹی ماؤنٹ ایورسٹ بھی سر کر چکے ہیں۔