یہ صفحہ دوست کو ای میل کیجیئے		پرِنٹ کریں

جنید ضیاء بنگلہ دیش کے خلاف متاثرکن کارکردگی کا مظاہرہ کرنے میں ناکام رہے

پاکستان نے بنگلہ دیش کے خلاف پانچ ایک روز میچوں کی سیریز کے آخری میچ میں بورڈ کے صدر لیفٹنٹ جنرل توقیر ضیاء کے بیٹے جنید ضیاء کو ڈراپ کر دیا ہے۔

پانچ ایک روزہ میچوں کی اس سیریز میں جنید نے اب تک کے چاروں میچوں میں پاکستان کی نمائندگی کی تاہم وہ کسی متاثر کن کارکردگی کا مظاہرہ نہ کر سکے۔

انہوں نے چار میچوں میں ایک سو ستائس رنز دیئے اور صرف تین وکٹیں حاصل کیں۔

کھیل کا معیار

ہمارے لئے یہ بات کوئی اہمیت نہیں رکھتی کہ کون جنرل اور کون غریب کا بیٹا ہے۔ ہمارے لئے انتخاب کا معیار عمدہ کھیل ہے۔

سلیکٹر عامر سہیل

جمعرات کو راولپنڈی میں ہونے والے میچ میں انیس سالہ سیم بالر نے چھ اوورز میں چھیالیس رنز دیئے اور کوئی وکٹ حاصل نہ کر سکے۔

پاکستان نے اس میچ میں پانچ وکٹوں سے کامیابی حاصل کی۔

اتوار کے روز کراچی میں ہونے والے میچ میں ان کی جگہ نئے کھلاڑی عبدالرؤف کا انتخاب کیا گیا ہے۔

جنید کی ٹیم میں شمولیت پر زبردست تنقید کی گئی تھا تاہم سلیکٹر عامر سہیل نے اس کا دفاع کرتے ہوئے کہا تھا کہ انہیں اہلیت کی بنیاد پر ٹیم میں لیا گیا ہے۔

عامر سہیل نے بی بی سی اردو سے گفتگو کرتے ہوئے کہا تھا: ’ہمارے لئے یہ بات کوئی اہمیت نہیں رکھتی کہ کون جنرل اور کون غریب کا بیٹا ہے۔ ہمارے لئے انتخاب کا معیار عمدہ کھیل ہے۔‘

جنید ضیاء کے والد لیفٹنٹ جنرل توقیر ضیاء دسمبر دو ہزار سے پاکستان کرکٹ بورڈ کے صدر ہیں۔

جنید ضیاء کو انڈر نائنٹین کی کپتان سے بھی سبکدوش کر دیا گیا ہے۔ اس فیصلہ کے بارے میں توقیر ضیاء نے بی بی سی اردو سروس کو بتایا کہ یہ فیصلہ کسی تنقید یا دباؤ کا نتیجہ نہیں ہے بلکہ اس کا مقصد جنید کو ٹیم میں اپنی جگہ بنانے کے لئے وقت دینا ہے تاکہ وہ اپنے کھیل پر توجہ دے سکیں۔