یہ صفحہ دوست کو ای میل کیجیئے		پرِنٹ کریں

دونوں ممالک کے کھلاڑی روابط کی بحالی چاہتے ہیں

بھارتی کرکٹ بورڈ کے سربراہ جگموہن ڈالیمانے کہا ہے کہ پاکستان کے ساتھ کرکٹ روابط بحال کرنے کے سلسلے میں ان کو بھارتی حکومت کی طرف سے مثبت اشارے ملے ہیں۔

ان کا کہنا ہے کہ ’حکومت نے ابھی حتمی اجازت تو نہیں دی ہے لیکن یوں معلوم ہوتا ہے کہ اس پر بہت جلد فیصلہ ہو جائے گا۔‘

بھارت کی کرکٹ ٹیم نے پاکستان میں چودہ برس سے کوئی میچ نہیں کھیلا ہے۔

لیکن اس سال عالمی کرکٹ مقابلے میں دونوں ٹیموں کے درمیان کھیلے جانے والے میچ سے یہ ظاہر ہوا کہ ان دونوں کے مقابلوں میں ماحول اتنا ہی مخصوص اور سنسنی خیز ہے جتنا ماضی میں رہا ہے۔

نومبر میں بھارت کی انڈر نائنٹین ٹیم پاکستان میں ہونے والے ایک چار ملکی ٹورنامنٹ میں شرکت کرے گی۔ اور دسمبر میں پاکستان کی اے ٹیم سری لنکا میں ایک سہہ ملکی مقابلے میں حصہ لے گی جس میں بھارت کی ٹیم بھی کھیلے گی۔

عالمی کرکٹ کونسل بھی ان دونوں ممالک کے درمیان کرکٹ روابط کی بحالی کی پوری حمایت کر رہی ہے۔

حال ہی میں آئی سی سی کے صدر احسان مانی نے کہا تھا کہ ’ہماری خواہش ہے کہ بھارتی حکومت کرکٹ کے ذریعے پاکستان اور بھارت کے درمیان تعلقات اور باہمی اعتماد کو بہتر بنائے۔‘