پاکستانی ٹیم پریکٹس میچ میں 247 رنز پر آؤٹ

پاکستان اور سری لنکا کے درمیان ٹیسٹ سیریز شروع ہونے سے پہلے ایک تین روزہ پریکٹس میچ میں پاکستان کی ٹیم پہلی اننگز میں 247 رنز بنا کر آؤٹ ہو گئی۔

کولمبو میں کھیلے جانے والے میچ میں پاکستانی ٹیم کے کپتان مصباح الحق نے ٹاس جیت کر سری لنکا بورڈ پریزیڈنٹ الیون کے خلاف پہلے بیٹنگ کرنے کا فیصلہ کیا۔

پاکستان کی اننگز کا آغاز اچھا نہیں تھا اور سات کے مجموعی سکور پر محمد حفیظ اور 39 کے مجموعی سکور پر اظہر علی آؤٹ ہو گئے۔

دونوں نے بالترتیب تین اور 12 رنزبنائے۔ ابتدائی نقصان کے بعد یونس خان اور احمد شہزاد کی شراکت داری میں سکور 152 رنز پر پہنچا تو یونس خان 64 رنز بنا کر آؤٹ ہو گئے۔

اس کے فوراً بعد احمد شہزاد بھی 82 رنز پر آؤٹ ہو گئے اور اس وقت مجموعی سکور 176 تھا، تاہم بعد میں آنے والے بلے باز ٹیم کے سکور کو زیادہ نہیں بڑھا سکے۔ کپتان مصباح نے 15 جبکہ اسد شفیق نے 27 رنز بنائے۔

سری لنکا پریزیڈنٹ الیون کی جانب وریندرے نے پانچ وکٹیں حاصل کیں۔

جواب میں سری لنکا پریزیڈنٹ الیون کی اننگز کا آغاز بھی متاثر کن نہیں رہا اور صفر کے مجموعی سکور پر اوپنر کرونارتنے جنید خان کے ہاتھوں آؤٹ ہو گئے۔

پہلے دن کے کھیل کے اختتام تک سی ایل بی پی کا مجموعی سکور ایک وکٹ کے نقصان پر 44 رنز تھا۔

پاکستانی ٹیم سری لنکا میں تین ٹیسٹ پانچ ون ڈے اور دو ٹی 20 انٹرنیشنل کھیلے گی۔

یاد رہے کہ پاکستانی ٹیم نے آخری بار سری لنکا کی سرزمین پر ٹیسٹ سیریز 2006 میں انضمام الحق کی قیادت میں جیتی تھی۔ اس کے بعد سے دونوں ٹیموں کے درمیان چھ ٹیسٹ سیریز کھیلی جا چکی ہیں جن میں سے سری لنکا نے اپنے ملک میں تینوں ٹیسٹ سیریز جیتی ہیں۔

پاکستان نے 2011 میں متحدہ عرب امارات میں کھیلی گئی ٹیسٹ سیریز جیتی جبکہ دو ٹیسٹ سیریز برابر رہی ہیں۔