’عالمی فٹ بال کپ کی کامیابی کے لیے پراعتماد ہوں‘

فٹ بال کی عالمی تنظیم فیفا کے صدر نے کہا ہے کہ وہ برازیل میں آئندہ ہفتے شروع ہونے والے عالمی فٹ بال کپ کی کامیابی کے لیے پر اعتماد ہیں۔

فیفا کے صدر سیپ بلیٹر نے برازیل کے عوام سے اپیل کی کہ وہ اس عالمی کپ کو کامیاب بنانے کے لیے جو کچھ بھی کر سکتے ہیں کریں۔

انھوں نے یہ بات جمعرات کو ساؤ پاؤلو شہر میں میٹرو کے کارکنوں کی ہڑتال کی وجہ سے ہونے والی ٹریفک جام سے نکلنے کے بعد کہی۔

فیفا کے حکام اس ٹریفک جام میں کئی گھنٹوں تک پھنسے رہے۔

حکومت اور میٹرو یونین کے مابین مذاکرات ناکام ہونے کی وجہ سے ہونے والی ہڑتال دوسرے دن میں داخل ہو گئی ہے جس کی وجہ سے مزید مشکلات پیش آئیں گی۔

ساؤ پاؤلو میں برازیل اور کرویشیا کے درمیان عالمی کپ کا ابتدائی میچ کھیلے جائے گا۔

پولیس اور دیگر سرکاری اداروں کے ملازمین نے خبردار کیا ہے کہ اگر ان کے مطالبات پورے نہیں ہوئے تو وہ بھی ہڑتال کریں گے۔

حالیہ احتجاج برازیل میں ہونے والے عالمی فٹ بال کپ کے لیے ایک نیا دھچکا ہے جس پر ٹورنامنٹ کے عالمی منتظمین نے تنقید بھی کی ہے۔

لیکن فیفا کے صدر نے عالمی کپ کے انعقاد کی طرف اشارہ کرتے ہوئے کہا کہ ’ہم پراعتماد ہیں کہ یہ ایک جشن ہوگا۔‘

اس سے پہلے برازیل میں فٹ بال کے عالمی کپ پر اٹھنے والے اخراجات کے خلاف مظاہرے کیے جا رہے ہیں۔

گذشتہ برس لاکھوں افراد نے عالمی کپ پر اٹھنے والے اخراجات اور بدعنوانی کے خلاف اور عوامی سہولیات میں بہتری کا مطالبہ کرتے ہوئے ملک بھر میں مظاہرے کیے تھے۔

تب سے اب تک برازیل میں متعدد مرتبہ مظاہرے ہو چکے ہیں جن میں سے کئی تشدد کے بعد ختم ہوئے۔