پاکستان کے عمر گل کو میچ کا بہترین کھلاڑی قرار دیا گیا
سری لنکا میں جاری ورلڈ ٹی ٹوئنٹی مقابلوں کے سپر ایٹ میچ میں پاکستان نے سنسنی خیز مقابلے کے بعد جنوبی افریقہ کو دو وکٹ سے شکست دے دی۔
پاکستان کی جیت میں اہم کردار عمر گل نے ادا کیا۔ انہوں نے سترہ گیندوں پر دو چوکوں اور تین چھکوں کی مدد سے بتیس رنز بنائے۔
عمر گل اور عمر اکمل نے آٹھویں وکٹ کے لیے انچاس رنز بنائے۔
پاکستان کی جانب سے عمر اکمل نے اکتالیس گیندوں پر چار چوکوں اور ایک چھکے کی مدد سے تینتالیس رنز بنائے اور آؤٹ نہیں ہوئے۔
جنوبی افریقہ کی جانب سے ڈیل سٹین نے تین اور پیٹرسن نے دو کھلاڑیوں کو آؤٹ کیا۔
اس سے پہلے کولمبو میں کھیلے جانے والے میچ میں جنوبی افریقہ نے ٹاس جیت کر پہلے کھیلنے کا فیصلہ کیا اور مقررہ بیس اوورز میں چھ وکٹ کے نقصان پر ایک سو تینتیس رنز بنائے۔
جان پال ڈومینی اڑتالیس رنز بنا کر جنوبی افریقہ کے سب سے کامیاب بلے باز رہے جبکہ پاکستان کی جانب سے محمد حفیظ اور یاسر عرفات نے دو، دو جبکہ سعید اجمل اور عمرگل نے ایک ایک کھلاڑی کو آؤٹ کیا۔
ایک سو چونتیس رنز کے ہدف کے تعاقب میں پاکستان کی جانب سے محمد حفیظ اور عمران نذیر نے اننگز کا آغاز کیا اور ٹیم کو چوبیس رنز کا آغاز دیا۔
اس موقع پر پاکستان کو پہلا نقصان اس وقت اٹھانا پڑا جب عمران نذیر چودہ رنز بنا کر کیچ ہوگئے۔ پاکستان کی اگلی تین وکٹیں مجموعی سکور میں تیرہ رن کے اضافے کے بعد گر گئیں۔
اس میچ کے لیے دونوں ٹیموں نے ایک ایک تبدیلی کی اور پریماداسا سٹیڈیم کی پچ کو مدِنظر رکھتے ہوئے سپنرز کو ٹیم میں شامل کیا گیا۔
پاکستانی ٹیم میں سہیل تنویر کی جگہ رضا حسن کو کھلایا گیا جبکہ جنوبی افریقہ نے آل راؤنڈر ڈوپلیسس کی جگہ رابن پیٹرسن کو دی گئی۔
پاکستان نے ابتدائی مرحلے میں نیوزی لینڈ اور بنگلہ دیش کو شکست دی تھی جبکہ جنوبی افریقہ نے میزبان سری لنکا اور زمبابوے کو ہرایا تھا۔
پاکستان کے عمر گل کو میچ کا بہترین کھلاڑی قرار دیا گیا۔
