Karachi Kings vs Islamabad United: اسلام آباد یونائیٹڈ کو چار وکٹوں سے شکست، کراچی کنگز سیمی فائنل میں

پاکستان سپر لیگ (پی ایس ایل) کے 28 ویں میں میچ کراچی کنگز نے اسلام آباد یونائیٹڈ کو چار وکٹوں سے شکست دے دی ہے۔

اسلام آباد یونائیٹڈ نے کراچی کنگز کو جیت کے لیے 137 رنز کا ہدف دیا تھا جو کراچی کنگز نے 20 ویں اوور کی دوسری گیند پر حاصل کر لیا۔

اس کے ساتھ ہی کراچی کنگز نے پوائنٹس ٹیبل پر اپنی دوسری پوزیشن کو محفوظ بنا لیا ہے جبکہ اب وہ سیمی فائنل میں پہنچ گئے ہیں۔

میچ کا مکمل سکور کارڈ

کراچی کنگز نے نہایت مستحکم آغاز کیا اور پانچ اوورز کے اندر ہی تقریباً نصف ہدف حاصل کر لیا لیکن اس کے بعد ان کے تعاقب کی رفتار میں کمی آئی اور چھ وکٹیں گر گئیں۔

کراچی کنگز کے اوپنر شرجیل خان عاکف جاوید کی گیند پر ایل بی ڈبلیو آؤٹ ہوئے جبکہ دوسرے اوپنر بابر اعظم محمد موسیٰ کی گیند پر بولڈ ہوئے۔

یہ بھی پڑھیے

پی ایس ایل 5: ایک وعدہ جسے پورا کر دکھایا گیا

28 غیر ملکی کھلاڑی پی ایس ایل کھیلنے پر رضامند

کورونا کا خوف پی ایس ایل پر بھی اثر انداز ہونے لگا

کیمرون ڈیل پورٹ 11 رنز بنا کر شاداب خان کی گیند پر آؤٹ ہوئے۔ افتخار احمد شاداب خان کی گیند پر آصف علی کے ہاتھوں کیچ آؤٹ ہوئے۔

کراچی کنگز کے کپتان عماد وسیم کو ظفر گوہر کی گیند نے پویلین کی راہ دکھائی جبکہ رومان رئیس کی گیند پر چیڈوک والٹن کے شاٹ کو حسین طلعت نے باؤنڈری تک پہنچنے نہ دیا اور وہ آؤٹ ہوگئے۔

کراچی کی جانب سے عمید آصف اور کرس جارڈن ناقابلِ شکست رہے۔

کراچی کنگز کے بولر عمید آصف کی گیند پر اسلام آباد کے اوپنر رضوان حسین 14 گیندوں پر 17 رنز بنا کر چیڈوک والٹن کے ہاتھوں کیچ آؤٹ ہوگئے۔

اوپنر فل سالٹ عماد وسیم کی گیند پر کرس جارڈن کے ہاتھوں کیچ آؤٹ ہوئے جبکہ کپتان شاداب خان ارشد اقبال کی گیند پر افتخار احمد کے ہاتھوں کیچ آؤٹ ہوئے۔

حسین طلعت افتخار احمد کی گیند پر ڈیلپورٹ کے ہاتھوں کیچ آؤٹ ہوئے، جبکہ آصف علی کرس جارڈن کی گیند پر اسامہ میر کے ہاتھوں کیچ آؤٹ ہوئے۔

کراچی کنگز نے ایلکس ہیلز کی جگہ کیمرون ڈیلپورٹ کو شامل کیا ہے۔

کراچی کنگز کے بلے باز بابر اعظم اس ٹورنامنٹ کے سب سے زیادہ رنز سکور کرنے والے کھلاڑی ہیں جنھوں نے 294 رنز بنائے ہیں جبکہ اسلام آباد کی جانب سے لیوک رونکی 266 رنز کے ساتھ تیسرے نمبر پر ہیں۔

لیکن بات کی جائے وکٹ کیپنگ کی، تو یہاں پر دونوں ٹیموں کی پوزیشنز ایک دوسرے سے جیسے بدل گئی ہیں کیونکہ یہاں لیوک رونکی سب سے کامیاب وکٹ کیپر ہیں جبکہ کراچی کنگز کے چیڈوک والٹن تیسرے نمبر پر ہیں۔

یاد رہے کہ جمعرات کو کورونا وائرس کے خطرے کے پیشِ نظر پاکستان کرکٹ بورڈ نے تمام ٹیموں میں موجود غیر ملکی کھلاڑیوں کو اپنے اپنے وطن واپس لوٹ جانے کی اجازت دے دی تھی۔

اس کے نتیجے میں کراچی کنگز کے ایلکس ہیلز جبکہ اسلام آباد یونائیٹڈ کے کولن منرو، ڈیل سٹین، ڈیوڈ ملان اور لیوک رونکی پی ایس ایل کے باقی میچز نہیں کھیلیں گے۔

اسلام آباد یونائیٹڈ کے غیر ملکی کھلاڑیوں میں کولن انگرام اور فِل سالٹ شامل ہیں۔

اسلام آباد یونائیٹڈ کا سکواڈ شاداب خان، آصف علی، فِل سالٹ، رومان رئیس، موسیٰ خان، کولن انگرام، حسین طلعت، ظفر گوہر، فہیم اشرف، رضوان حسین اور عاکف جاوید پر مشتمل ہے۔

کراچی کنگز کی جانب سے عماد وسیم، بابر اعظم، شرجیل خان، اسامہ میر، کیمرون ڈیلپورٹ، چیڈوک والٹن، عمید آصف، محمد عامر، کرس جارڈن، افتخار احمد، اور ارشد اقبال آج کھیل رہے ہیں۔