ہیوی ویٹ باکسنگ کی تاریخ کا سب سے بڑا اپ سیٹ

میکسیکن نژاد امریکی باکسر اینڈی روئز جونیر نے یونیفائڈ چیمپیئن اینتھونوی جوشوا کو ناک آوٹ کر کے ان سے تین ٹائٹل چھین لیے ہیں۔

برطانوی باکسر اینتھونی جوشوا جو آئی بی ایف، ڈبلیو بی او اور ڈبلیو بی اے تینوں ٹائٹل کے فاتح تھے، اینڈی روئز سے ساتویں راؤنڈ میں ناک آوٹ ہوگئے۔

روئز کی جیت نے باکسنگ کی دنیا کو اس لیے ہلا دیا ہے کہ کسی کو بھی یہ امید نہیں تھی کہ وہ اب تک شکست نہ کھانے والے جوشوا کو ہرا دیں گے۔

جوشا کا اس میچ سے پہلے ریکاڈ 22 میچوں میں 21 ناک آوٹ فتوحات کا تھا۔

ان کا نام اب مائئک ٹائسن اور لیناکس لوئیس جیسے باکسرز کی صفوں میں آئے گا جنھیں اپنے کیریر کے عروج پر اپ سیٹ یا ناقبلِ یقین شکست کا سامنا کرنا پڑا، اور ان نتائج نے اس وقت باکسنگ کی دنیا کو جھنجوڑ کر رکھ دیا۔

29 برس کے روئیز کا جوشوا کے ساتھ سامنا پہلے سے طے ہی نہیں ۔ جوشوا کا میچ جیرل مِلر سے تھا، لیکن مِلر کے ٹیسٹ کرنے سے پتا چلا کہ وہ طاقت بڑھانے کے لیے غیر قانونی ادویات یا سٹیروائڈ کا استعمال کررہے ہیں۔ جس کے بعد دوہفتے کے اندر منتظمین کو نئے باکسر کی تلاش کرنا پڑی۔

ناقدین نے لوئیز کے بارے میں کہا تھا کہ وہ جوشوا کے درجے کے باکسر نہیں اور جوشوا کو اپنے مداحوں سے لوئیز سے لڑنے پر ناراضگی اور غصے کا بھی سامنا کرنا پڑا تھا۔

تاہم لوئیز نے ماہرین، ناقدین اور مداحوں سب کو غلط ثابت کیا اور ہیوی ویٹ چیمپیئن بننے والے پہلے میکسیکن ہونے کا اعزاز بھی حاصل کیا ۔

جوشوا نے میچ کے بعد بات کرتے ہوئے کہا کہ 'آج میں ایک اچھے باکسر سے ہارا ہوں۔ وہ، فی الحال چیمپیئن ہے۔ میں واپس آوں گا۔ '

عمومًا اپ سیٹ میچوں میں بڑے درجے کے کھلاڑی کے لیے ایک غلط پنچ ہی ناک آؤٹ پنچ ثابت ہوتا ہے۔ لیکن یہاں اینڈی روئئز جونیر نے ایک ورلڈ چیمپیئن کو ہر ایک راؤنڈ میں آہستہ آہستہ اپنے مکوں سے توڑا اور تھکایا۔ جوشوا نے روئیز کو بائیں پنچ سے تیسرے راؤنڈ میں گرا دیا تاہم اٹھتے ساتھ ہی روئیز نےجوشوا کے سر پر سیدھے ہاتھ سے پنچ کیا جس کے نتیجے میں جوشوا گر گئے۔ جوشوا متعدد بار گرے اور تھکے ہوئے نظر آئے۔

یاد رہے کہ جوشوا کی کیریر کی سب سے بڑی فائٹ کہلانے والے مقابلے میں انھوں نے یوکرین کے ولادیمیر کلٹشکو کو گیارویں راؤنڈ میں ناک آؤٹ کر کے ورلڈ ہیوی ویٹ ٹائٹل جیتا تھا۔