کولمبیا: حادثے سے پہلے جہاز میں ’ایندھن ختم ہو گیا تھا‘
،تصویر کا ذریعہGetty Images
کولمبیا میں افشا ہونے والی آڈیو کے مطابق برازیل کی ایک فٹبال ٹیم کے کھلاڑیوں کو لیجانے والے چارٹرڈ ہوائی جہاز میں حادثے سے پہلے ایندھن ختم ہو گیا تھا۔
حادثے کا شکار ہونے والے چارچرڈ طیارے میں برازیلی فٹبال کلب چپیکونس کے کھلاڑیوں سمیت 77 سوار تھے جن میں صرف چھ افراد زندہ بچے ہیں۔
ہوائی جہاز کے پائلٹ اور کولمبیا کے ایئر ٹریفک کنٹرول کے درمیان ہونے والی بات چیت کی آڈیو ٹیپ منظرعام پر آئی ہے جس میں پائلٹ کو متعدد بار یہ کہتے ہوئے سنا جا سکتا ہے کہ الیکڑانک نظام فیل ہونے اور ایندھن ختم ہونے کی وجہ سے لینڈنگ کی اجازت دی جائے۔
افشا ہونے والی آڈیو ٹیپ سے اندازہ ہوتا ہے کہ حادثے سے پہلے آخری لمحات میں کیا ہوا۔
اس آڈیو میں پائلٹ کو وارننگ دیتے ہوئے سنا جا سکتا ہے کہ جہاز کا الیکڑانک نظام مکمل طور پر فیل ہو گیا ہے جبکہ جہاز میں ایندھن بھی نہیں ہے۔
کولمبیا کی فوج کے ذرائع نے فرانسیسی خبر رساں ایجنسی اے ایف پی کو بتایا ہے کہ حادثے سے پہلے جہاز میں کوئی دھماکہ نہیں ہوا تھا جبکہ ایندھن بھی نہیں تھا۔
انھوں نے بتایا کہ ابھی تک یہ واضح نہیں ہو سکا کہ جہاز میں ایندھن کیوں ختم ہو گیا تھا، آیا لیکیج یا رساؤ کی وجہ سے ایندھن ختم ہوا یا اس میں ایندھن پہلے سے ہی کم تھا۔
End of سب سے زیادہ پڑھی جانے والی
حادثے کی تحقیقات کرنے والے حکام نے ابھی تک حادثے کی وجوہات کے بارے میں معلومات فراہم نہیں کی ہیں جبکہ تحقیقات مکمل ہونے میں کئی ماہ لگ سکتے ہیں۔
ہوائی حادثے میں برازیل کے فٹبال کلب کے کھلاڑیوں کی موت کے بعد دنیا بھر میں فٹبال شائقین سوگ منا رہے ہیں۔
،تصویر کا ذریعہGetty Images
یہ ٹیم کوپا سڈامریکانا کا فائنل میچ کھیلنے جا رہی تھی جسے اس کلب کی تاریخ کا سب سے بڑا مقابلہ قرار دیا جارہا تھا۔
بارسلونا کلب کے لیونل میسی اور نیمار، مانچسٹریونائیٹڈ کلب کے وائن رونی سمیت کئی نامور کھلاڑیوں نے ہلاک ہونے والے کھلاڑیوں کو خراج عقیدت پیش کیا۔
کولمبیا کے ہوابازی کے محکمے کا کہنا ہے کہ طیارے میں 21 صحافی بھی سوار تھے اور دونوں فلائٹ ریکارڈرز مل گئے ہیں۔
پیر کو پرواز کے دوران طیارے کا میڈیلن شہر کے قریب پائلٹ کی جانب سے فنی خرابی کا بتایا گیا تھا جس کے بعد اس کا کنٹرول ٹاورز سے مقامی وقت کے مطابق شب 11:15 بجے پر رابطہ منقطع ہوگیا تھا۔ جس کے بعد طیارہ شہر سے باہر واقع پہاڑی علاقے میں گر گیا۔
،تصویر کا ذریعہAP
ابتدائی طور پر طیارے میں سوار افراد کی تعداد 81 بتائی گئی تھی تاہم کولمبین حکام کے مطابق ان میں سے چار افراد طیارے میں سوار نہیں ہوئے تھے۔
حادثے میں بچ جانے والے چھ افراد میں سے تین فٹبال کھلاڑی ہیں۔ جن میں ایلن روشل ، ہلیو زیمپر اور گول کیپر جیکسن فولمین شامل ہیں۔
ڈنیلو کے نام سے جانے پہچانے جانے والے فٹبال کھلاڑی گول کیپر مارکوس پڈلہا کو بھی ملبے سے زندہ نکالا گیا تھا تاہم وہ ہسپتال میں چل بسے۔
طیارے میں سوار 21 صحافیوں میں سے چھ فاکس سپورٹس برازیل اور دیگر گلوبو میڈیا کے لیے کام کرتے تھے۔
