سپیس ایکس راکٹ: کینیڈی خلائی مرکز میں دھماکہ

امریکی ریاست فلوریڈا میں کینیڈی خلائی مرکز میں اس وقت دھماکہ ہوا جب ایک ایروسپیس کمپنی سپیس ایکس اپنا نیا راکٹ لانچ کرنے کی تیاری کر رہی تھی۔

دھماکے کی طاقت نے کئی میل دور واقع عمارتوں کو بھی ہِلا کر رکھ دیا۔

سپیس ایکس کا کہنا ہے کہ دھماکہ اس وقت ہوا جب کمپنی ایک راکٹ کو خلا میں بھیجنے کی تیاری کر رہی تھی۔

کمپنی کا کہنا ہے کہ دھماکے سے ایک شخص زخمی ہوا ہے۔

امریکی خلائی ادارے ناسا نے کہا ہے کہ سپیس ایکس راکٹ کو خلا میں بھیجنے کی تیاری کر رہی تھی جس نے اختتام ہفتہ ایک سیٹلائیٹ کو خلا میں لے جانا تھا۔

وہاں سے موصول ہونے والی تصویروں میں دھوئیں کے بڑے بڑے بادل کیپ کاناویرل کمپلکس کے قریب فضا میں بلند ہوتے ہوئے نظر آ رہے ہیں۔

مقامی ایمرجنسی اہلکاروں نے حادثے کو ’ٹیسٹ فائر کے موقع پر ہونی والی ایک بڑی تباہی‘ قرار دیا۔

بریورڈ کاؤنٹی ایمرجنسی مینیجمنٹ آفس نے ایک ٹویٹ میں کہا ہے کہ اس سے عوام کو کوئی خطرہ نہیں ہے۔

خلائی فرم سپیس ایکس اپنے تجربے کے ذریعے دوبارہ استعمال کے قابل راکٹوں اور سستے نجی خلائی سفر کا ایک نیا دور شروع کرنے کی کوشش کر رہی ہے۔ کمپنی ایپنے فالکن 9 راکٹ کے ذریعے سامان بین الاقوامی خلائی سٹیشن تک پہنچا چکی ہے۔

اپریل میں کیلیورنیا میں قائم کمپنی کا فالکن 9 نامی راکٹ کامیابی سے ایک سمندری پلیٹ فارم پر اترا تھا۔ اس سے پہلے کمپنی کی چار کوششیں ناکام رہی تھیں۔