آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
گذشتہ سال 410 بلین روپے کی موبائل فون بینکنگ کی گئی: سٹیٹ بینک
پاکستان کے سٹیٹ بینک کا کہنا ہے کہ موبائل فون بینکنگ کے استعمال میں 195 فیصد اضافے سے گذشتہ مالی سال کے دوران 410 بلین روپے کی موبائل فون بینکنگ کی گئی۔
سٹیٹ بینک آف پاکستان کے تازہ اعداد و شمار کے مطابق 21 بینک موبائل فون بینکنگ کی سہولت فراہم کرتے ہیں اور جون 2018 میں اس سہولت کو استعمال کرنے والوں کی تعداد 34 لاکھ تھی۔
تازہ رپورٹ میں مزید کہا گیا ہے کہ موبائل فون بینکنگ کا زیادہ استعمال ایک اکاؤنٹ سے دوسرے اکاؤنٹ میں رقم کی منتقلی کے لیے کیا گیا۔ اس حوالے سے 50 لاکھ ٹرانزیکشنز کی گئیں جن کا مجموعی حجم 196.4 ملین روپے تھا۔
موبائل فون بینکنگ کا استعمال یوٹیلیٹی بل کی ادائیگی کے لیے بھی بہت زیادہ کیا گیا جس کی ٹرانزیکشنز کی تعداد ایک کروڑ دس لاکھ تھی اور اس کا کُل حجم 10.5 بلین روپے تھا۔
سٹیٹ بینک کے مطابق ای بینکنگ چینلز جن میں آن لائن ٹرانزیکشنز، اے ٹی ایم، ای کامرس، انٹرنیٹ، موبائل فون اور کال سینٹرز بینکنگ میں کُل 656.4 ملین ٹرانزیکشنز کی گئیں جن کی مالیت 47.4 بلین روپے تھی۔
سیٹیٹ بینک کی رپورٹ کے مطابق 2017 کے مالی سال کے مقابلے میں 2018 کے مالی سال میں فون بینکنگ کی تعداد میں 21 فیصد جبکہ مالیت کے حساب سے 28 فیصد اضافہ ہوا ہے۔
پی ٹی اے کے مطابق 2018 کی پہلی سہ ماہی میں موبائل فون استعمال کرنے والوں کی تعداد میں ایک کروڑ پانچ لاکھ کا اضافہ ہوا تھا۔
