آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ماتم گسار جنگل
فوٹوگرافر اور سٹریٹ آرٹسٹ فلپ ایکاروکس نے ایمزان کے جنگلوں کی مسلسل تباہی کی جانب توجہ مرکوز کروانے کی غرض سے چند بےحد طاقتور تصاویر تیار کی ہیں۔
ذرائع کے مطابق برازیل کی حکومت کی کوششوں کے باوجود درختوں کی کٹائی بدستور جاری ہے۔
مغربی برازیل میں بسنے والے آبائی قبیلے پیٹر سوروئی سے مل کر ایکاروکس نے یہ تصاویر تیار کی ہیں۔ اس مقصد کے لیے انھوں نے مقامی قبائلیوں کی تصاویر جنگل کی تصاویر سے آمیز کی ہیں۔
المیر نارایاموگا مقامی قبیلے کے سردار ہیں۔ ان کے قبیلے کی کل آبادی 1300 نفوس پر مشتمل ہے۔ انھیں حکومت نے درخت اگانے کی ذمہ داری سونپی ہے۔
وہ کہتے ہیں: ’اس سال کے آغاز سے اب تک اس جنگل پر کٹائی والوں اور سونے اور ہیروں کے کان کنوں کی یلغار ہے۔ ہر روز لکڑیوں سے بھرے ہوئے 300 ٹرک ہمارے علاقے سے جاتے ہیں۔‘
اس کام میں اضافہ ہو رہا ہے باوجود اس کے کہ برازیل کا آئین کسی قبیلے کی زمین کے تحفظ کی ضمانت دیتا ہے۔
غیرقانونی ٹمبر مافیا بھاری مشینری استعمال کر رہی ہے۔ سوروئی کے علاقے کے تین دریاؤں میں پارہ اور سائنائیڈ پائے گئے ہیں۔
