ایران کا خفیہ جوہری مرکز جسے صرف ایک امریکی بم نشانہ بنا سکتا ہے

زمین کے نیچے کافی گہرائی میں ہونے کی وجہ سے فردو کی جوہری تنصیبات کو نشانہ بنانا اسرائیلی فوج کے لیے ایک منفرد چیلنج ہے۔

اس کارخانے کو کوئی معنی خیز نقصان پہنچانے کے لیے اسے ایسے ’بنکر بسٹر‘ بم سے نشانہ بنانے کی ضرورت ہوگی جو سطح کے نیچے گہرائی تک گھسنے کے قابل ہو۔

خیال کیا جاتا ہے کہ اسرائیل کے پاس ایسے ہتھیار ہیں لیکن وہ صرف 10 میٹر (33 فٹ) سے کم گہرائی تک کارگر ہو سکتے ہیں۔ تاہم امریکہ کے پاس ایک ایسا بم ہے جو یہ کام کر سکتا ہے۔ یہ 13 ہزار کلوگرام وزنی جی بی یو-57 اے/بی میسیو آرڈیننس پینیٹریٹر (ایم او پی) بم ہے۔

دفاعی انٹیلی جنس کمپنی جینز کے تجزیہ کاروں کے مطابق اس بم کا وزن اور بھاری دھاتی خول اسے دھماکے سے قبل زمین کے اندر 61 میٹر تک گھسنے کی صلاحیت دیتا ہے۔ اگر زمین میں کنکریٹ بھرا گیا ہو تب بھی یہ 18 میٹر تک کی گہرائی تک جا سکتا ہے۔

لیکن ایسے ایک بم کا استعمال بھی فردو کی جوہری تنصیبات کو تباہ کرنے کی ضمانت نہیں تھا کیونکہ خیال کیا جاتا ہے کہ وہاں کی سرنگیں سطحِ زمین سے 80 سے 90 میٹر نیچے ہیں اور تباہی کے لیے ایک سے زیادہ بموں کی ضرورت ہو سکتی ہے۔

فردو نطنز میں واقع ایران کے زیر زمین یورینیم افزودگی کے دوسرے کارخانے سے کہیں زیادہ گہرا ہے، جس کے بارے میں تجزیہ کاروں کا خیال ہے کہ وہ سطح زمین سے تقریباً 20 میٹر (65 فٹ) نیچے واقع ہے۔

آئرش ڈیفنس فورسز کے سابق سربراہ وائس ایڈمرل مارک میلٹ نے بی بی سی ویریفائی سے بات کرتے ہوئے کہا کہ ان ’بنکر بسٹرز‘ کے فردو جیسے مقام کو تباہ کرنے کے امکانات کا انحصار اس بات پر ہوگا کہ زیر زمین سرنگیں کتنی مضبوط ہیں۔

ان کا کہنا تھا ’ایران کو اس قسم کے اسلحے کی تفصیلات معلوم ہوں گی۔ وہ جانتے ہوں گے کہ انھیں اس سے بچاؤ اور اس کا اثر برداشت کرنے کے لیے کس چیز کی ضرورت ہے۔ تو سوال یہ ہے کہ کیا (فردو کی تنصیبات) اس اسلحے کی پہنچ سے باہر ہیں؟‘

امریکہ ایران میں اہداف پر یہ بنکر بسٹر بم استعمال کرتا ہے تو اس کی ایک نشانی اس کے بی 2 سٹیلتھ بمبار طیاروں کی ڈیاگو گارسیا کے اڈے پر تعیناتی ہو گی۔ یہ اڈہ ایرانی تنصیب سے 2300 میل دور تو واقع ہے لیکن بی 2 بمبار کی رینج کے اندر ہے۔

بی 2 وہ واحد امریکی بمبار طیارہ ہے جو اس ساڑھے 20 فٹ لمبے اور 13 ہزار کلوگرام وزنی بم کو لے کر پرواز کرنے کی صلاحیت رکھتا ہے۔

اپریل کے اوائل میں ڈیاگو گارسیا کے اڈے پر چھ بی 2 بمبار طیاروں کی تصویر لی گئی تھی لیکن یہ واضح نہیں ہے کہ آیا اس وقت وہاں ایسا کوئی طیارہ موجود ہے یا نہیں کیونکہ وہ حالیہ سیٹلائٹ تصویروں میں انھیں نہیں دیکھا گیا۔

برطانیہ کی رائل ایئرفورس کے سابق نائب آپریشنز چیف ایئر مارشل گریگ بیگویل نے بی بی سی ویریفائی کو بتایا کہ امریکہ کے لیے ڈیگو گارسیا سے بی 2 بمبار طیاروں کی پروازیں چلانا ملک کے اندر سے ایسی پروازیں چلانے سے زیادہ کارگر ہو گا۔

تاہم ان کا یہ بھی کہنا تھا ’ہم یہاں جو بات کر رہے ہیں وہ بنکرز کے خلاف ایک مستقل آپریشن نہیں ہے۔ اس کام کے لیے صرف ایک یا دو بموں کی ضرورت پڑ سکتی ہے۔‘

امریکی صدر ڈونلڈ ٹرمپ نے تصدیق کی ہے کہ امریکی جنگی طیاروں نے ایران میں تین جوہری تنصیبات پر حملے کیے جن میں فردو کی تنصیبات بھی شامل ہیں۔ یہ اسرائیل اور ایران کے درمیان تنازعے میں ایک بڑے اضافے کی علامت ہے۔

ٹیلی ویژن پر اپنے خطاب میں صدر ٹرمپ نے ان حملوں کو 'ان سب میں سے اب تک کا سب سے مشکل حملہ' قرار دیا اور متنبہ کیا کہ اگر امن کی کوششیں ناکام ہوئیں تو مزید حملے کیے جا سکتے ہیں۔ انھوں نے کہا کہ امریکہ مزید اہداف کو درست، تیز رفتاری اور مہارت کے ساتھ نشانہ بنانے کی صلاحیت رکھتا ہے۔

امریکی حکام نے بی بی سی کے امریکی پارٹنر سی بی ایس نیوز کو بتایا کہ واشنگٹن نے حملوں سے قبل سفارتی ذرائع سے تہران سے رابطہ کیا تھا اور واضح کیا تھا کہ مزید حملوں کی منصوبہ بندی نہیں کی گئی تھی اور حکومت کی تبدیلی اس کا مقصد نہیں تھا۔ اسرائیل کا کہنا ہے کہ وہ حملے سے قبل امریکہ کے ساتھ مکمل تعاون کر رہا تھا۔ ایران نے خبردار کیا تھا کہ کسی بھی امریکی مداخلت سے جنگ میں توسیع کا خطرہ ہے اور اس نے اشارہ دیا ہے کہ وہ اب خطے میں امریکی افواج کو نشانہ بنا سکتا ہے۔