پاکستان کے قبائلی علاقوں میں امریکی جاسوس طیاروں کے حملے گزشتہ کئی سال سے جاری ہیں
پاکستان کے قبائلی علاقے جنوبی وزیرستان میں امریکی جاسوس طیارے کے حملے میں ایک غیر ملکی ہلاک ہوگیا ہے۔
مقامی انتظامیہ کے مطابق یہ حملہ سنیچر کو وانا بازار سے بارہ کلو میٹر دور تحصیل ورمل کے علاقے شین ورسک میں ہوا۔
اس حملے میں جاسوس طیارے نے دو میزائل داغے اور ایک مکان اور اس کے باہر موجود ایک غیر ملکی کو نشانہ بنایا گیا۔
انتظامیہ کا کہنا ہے کہ ان حملوں میں نشانہ بنائے جانے والا غیر ملکی ہلاک ہوگیا جبکہ مکان کو بھی نقصان پہنچا۔
مقامی ذرائع کا کہنا ہے کہ ہلاک ہونے والے غیرملکی کا تعلق یمن سے تھا۔ ذرائع کے مطابق عبدالرحمان نامی یہ شخص نو سال سے وانا میں مقیم تھا تاہم اس نے تین ماہ قبل ہی شین ورسک میں رہائش اختیار کی تھی۔
پاکستان کے قبائلی علاقوں میں امریکی جاسوس طیاروں کے حملے گزشتہ کئی سال سے جاری ہیں۔ ان حملوں میں پاک امریکہ تعلقات کے دوران کمی یا وقتی تعطل آتا ہے تاہم یہ یہ حملے مکمل طور پر کبھی بند نہیں ہوئے۔
گزشتہ سال نومبر میں سلالہ میں پاکستانی سکیورٹی فورسز کی چیک پوسٹوں پر نیٹو کے فضائی حملے کے بعد ان ڈرون حملوں میں تعطل آیا تھا تاہم کچھ عرصے کے بعد حملوں کا آغاز دوبارہ ہو گیا۔
پاکستان کی مختلف سیاسی اور مذہبی جماعتیں ڈرون حملوں کے خلاف احتجاج کرتی رہی ہیں۔ حال ہی میں سیاسی جماعت تحریکِ انصاف نے ان حملوں کے خلاف اسلام آباد سے قبائلی علاقہ جات تک ریلی بھی کی تھی۔
