پنجاب اسمبلی میں ہنگامہ آرائی، پرویز الہٰی سپیکر منتخب
،تصویر کا ذریعہAFP
پاکستان کی پنجاب اسمبلی میں نعرہ بازی اور ہنگامہ آرائی کے دوران ہونے والے سپیکر کے انتخاب میں پاکستان تحریک انصاف اور مسلم لیگ قاف کے مشترکہ امیدوار چوہدری پرویز الٰہی سپیکر جبکہ تحریک انصاف کے دوست محمد مزاری ڈپٹی سپیکر منتخب ہو گئے ہیں۔
جمعرات کو سپیکر منتخب ہونے کے بعد پرویز الٰہی نے سپیکر کا حلف اٹھایا۔
پرویز الٰہی کے سپیکر منتخب ہونے کے بعد پاکستان مسلم لیگ نواز کا قلعہ سمجھے جانے والے پنجاب میں نواز لیگ مسلسل 10 برس تک حکومت کرنے کے بعد حزبِ اختلاف کی جماعت بن گئی ہے۔
سپیکر کے انتخاب کے لیے 349 ممبران نے ووٹ ڈالے جس میں سے پرویز الٰہی نے 201 ووٹ حاصل کر کے فتح حاصل کی جبکہ مسلم لیگ نواز کے امیدوار چوہدری اقبال گجر نے 147 ووٹ حاصل کیے اور ایک ووٹ مسترد ہوا۔
یہ بھی پڑھیں!
End of سب سے زیادہ پڑھی جانے والی
پاکستان مسلم لیگ نواز کے پنجاب اسمبلی میں 164 اراکین ہیں تاہم سپیکر کے انتخاب کے لیے ان کے امیدوار کو صرف 147 ووٹ پڑے۔
ڈپٹی سپیکر کے انتخاب میں پاکستان تحریک انصاف نے سردار دوست محمد مزاری نے 187 ووٹ حاصل کر کے کامیابی حاصل کی جبکہ ان کے مدمقابل پاکستان مسلم لیگ نون کے محمد وارث کلو 159 ووٹ حاصل کر سکے۔
تجزیہ کاروں کا کہنا ہے کہ نواز لیگ کے امیدوار کو 17 ووٹ کم پڑنے سے یہ بات واضح کر دی ہے کہ جماعت کے اندر فارورڈ بلاک بن گیا ہے۔
پنجاب اسمبلی کا جمعرات کو اجلاس شروع ہوا تو عددی اعتبار سے مضبوط مسلم لیگ نواز کے ممبران نے نعرہ بازی کی اور سپیکر کے روسٹم کے سامنے جمع ہو گئے۔
مراد علی شاہ وزیر اعلیٰ منتخب
،تصویر کا ذریعہAFP
پاکستان پیپلزپارٹی کے رہنما مراد علی شاہ آئندہ 5 سال کے لیے سندھ کے نئے وزیرِاعلیٰ منتخب ہوگئے ہیں۔
سندھ اسمبلی میں قائدِ ایوان کے انتخاب کے لیے سپیکر آغا سراج دارنی کی سربراہی میں اجلاس ہوا۔
وزیرِ اعلیٰ سندھ کے لیے پیپلز پارٹی کی جانب سے مراد علی شاہ جبکہ متحدہ اپوزیشن کی جانب سے شہریار مہر کو نامزد کیا گیا تھا۔
مراد علی شاہ کے حق میں 97 اراکین جبکہ شہریار مہر کے حق میں 61 اراکین اسمبلی نے ووٹ دیے۔
سپیکر سندھ اسمبلی نے مراد علی شاہ کی جیت کا اعلان کیا جس کے ساتھ ہی وہ مسلسل دوسری مرتبہ وزیرِ اعلیٰ سندھ منتخب ہوگئے۔
بلوچستان اسمبلی: عبد القدوس بزنجو سپیکر منتخب
سابق وزیر اعلیٰ میر عبد القدوس بزنجو کثرت رائے سے پاکستان کے صوبہ بلوچستان کی اسمبلی کے سپیکر منتخب ہوگئے ہیں۔
سپیکر اور ڈپٹی سپیکر کے انتخاب کے لیے مجموعی طور بلوچستان اسمبلی کے 59 امیدواروں نے ووٹ ڈالے۔
ان میں سے قدوس بزنجو 39 ووٹ لے کر سپیکر منتخب ہوگئے جبکہ ان کے مقابلے میں حاجی محمد نواز نے 20ووٹ حاصل کیے۔
میر عبد القدوس بزنجو بلوچستان عوامی پارٹی اور اس کی اتحادی جماعتوں جبکہ حاجی محمد نواز متحدہ مجلس عمل اور بلوچستان نیشنل پارٹی پر مشتمل اتحاد کا مشترکہ امیدوار تھے۔
