زکریا موسوی اپنی ڈگری وصول کرتے ہوئے(فائل فوٹو)

چھتیس سالہ زکریا موسوی نے اپنے اوپر لگے چھ الزامات کو تسلیم کیا۔ تاہم انہوں نے کہا کہ وہ گیارہ ستمبر کو ہونے والے حملے کے منصوبے میں شامل نہیں تھے لیکن وائٹ ہاوس پر جہاز گرانے کے ایک وسیع تر منصوبے کا حصہ تھے۔

امریکی حکومت نے کہا ہے کہ وہ زکریا موسوی کے لیے سزائے موت کی درخواست کرے گی جبکہ موسوی کا کہنا ہے کہ وہ اس درخواست کی مخالفت کریں گے۔

زکریا موسوی پر گیارہ ستمبر کے حملوں کی سازش کے سلسلے میں چھ الزامات عائد کیے گئے تھے جن میں سے چار کے لیے ان کو سزائے موت مل سکتی ہے۔

ان پر دہشت گردی، طیارے کے اغوا، طیارے کو تباہ کرنے اور مہلک ہتھیاروں کے استعمال کی سازش کے علاوہ امریکی اہلکاروں کو ہلاک اور املاک تباہ کرنے کی سازش کا الزام لگایا گیاتھا۔

زکریا موسوی کے وکلاء نے انہیں اقرار جرم سے باز رکھنے کی کوشش کی تھی اور ان کا مؤقف تھا کہ ان کے مؤکل کی ذہنی حالت درست نہیں ہے۔ مقدمے کے جج نے فیصلہ دیا کہ زکریا موسوی ذہنی طور پر صحت مند ہیں اور ان کا مؤقف سنا جا سکتا ہے۔

موسوی نے اس سے پہلے سنہ دو ہزار دو میں بھی اقرار جرم کا ارادہ ظاہر کیا تھا لیکن انہوں نے نظر ثانی کے لیے ملنے والے دو ہفتوں کے دوران ارادہ بدل دیا۔

زکریا موسوی کو گیارہ ستمبر کو ہونے والے حملوں سے ایک ماہ قبل گرفتار کیا گیا تھا اور امریکی حکام کا کہنا تھا کہ اگر وہ پکڑے نہ جاتے تو حملہ آوروں میں شامل ہوتے۔

امریکہ جانے سے پہلے زکریا موسوی نو سال کے دوران مختلف اوقات میں لندن میں رہے جہاں وہ فنزبری پارک کی مسجد جایا کرتے تھے۔

زکریا موسوی نے جج سے مخاطب ہو کر کہا کہ کہ اپنے اوپر لگے الزامات کو سمجھتے ہیں اور ’امریکیوں سے کسی نرم رویے کی توقع نہیں رکھتے‘۔ ایک سوال کے جواب میں موسوی نے کہا کہ انہیں اقرار جرم کے لیے امریکی حکومت نے کوئی پیشکش نہیں کی۔