’میرے خلاف بغاوت کے پیچھے بھی امریکہ کا ہاتھ تھا‘

انہوں نے کہا کہ ’اگر مجھے مارا گیا تو اس کی ذمہ داری جس شخص پر ہوگی اس کا نام جارج بُش ہے‘۔

شاویز جنہوں نے اپنے دعوے کے حق میں کوئی ثبوت پیش نہیں کیا کہا کہ ان کی زندگی پر حملے کا رد عمل ہو گا اور انہوں نے امریکہ کو تیل کی سپلائی بند کرنے کی دھمکی دی۔

وینزویلا امریکہ کو یومیہ پندرہ لاکھ بیرل تیل فروخت کرتا ہے۔

شاویز نے بظاہر اعلیٰ امریکی حکام کی طرف سے اپنی بائیں بازو کی حکومت پر بڑھتی ہوئی تنقید کے جواب میں یہ بیان دیا۔

امریکی وزیر خارجہ کونڈولیزا رائس نے حال ہی میں ہیوگو شاویز کو لاطینی امریکہ میں ایک منفی قوت قرار دیا۔

امریکی خفیہ ادارے سی آئی اے کے سربراہ پورٹر گوس نے کہا کہ ہیوگو شاویز خطے میں ممکنہ عدم استحکام کا باعث ہو سکتے ہیں۔

امریکہ کو ہیوگو شاویز پر مبینہ طور پر حزب اختلاف کے خلاف سخت اقدامات کرنے اور روس سے اسلحہ خریدنے پر اعتراض ہے۔

انیس سو نناونے میں ہیوگو شاویز کے اقتدار میں آنے کے بعد سے امریکہ اور وینزویلا کے سفارتی تعلقات بتدریج بگڑ رہے ہیں۔

ہیوگو شاویز نے کہا کہ اگر امریکہ نے انہیں قتل کرنے کی کوشش کی تو وہ پچھتائے گا۔

انہوں نے الزام لگایا کہ سن دو ہزار دو میں انہیں اقتدار سے ہٹانے کے لیے ملک میں ہونے والی بغُاوت کے پیچھے بھی امریکہ کا ہاتھ تھا۔

اس سے پہلے کیوبا کے صدر فیدیل کاسترو بھی کہہ چکے ہیں کہ اگر شاویز کو قتل کیا گیا تو اس کا الزام امریکہ پر عائد ہوگا۔