ملاوی کے ججوں نے اس طرح کی گاڑیوں کے حصول کے لیے ہڑتال کر دی ہے۔

ملاوی ہائی کورٹ کے رجسٹرار جو ججوں کے ترجمان کا کردار ادا کر رہے ہیں ، نے کہا ہےججوں کی یہ ہڑتال اس وقت تک جاری رہے گی جب تک حکومت چھبیس نئی ماڈل کی ٹیوٹا پریڈو جیپیں میہا نہیں کرتی ۔

ججوں کا کہنا کہ ان کے زیر استعمال ٹیوٹا کرولا گاڑیاں دس سال پرانی ہیں اور حکومت نے ان کو تبدیل کا وعدہ کر رکھا ہے۔

ملک کے اٹارنی جنرل نے، جواس انوکھی ہڑتال کو ختم کرانے کی کوشش کر رہے ہیں، کہا ہے کہ یہ بدقسمتی ہے کہ ججوں نے نئی حکومت کو سزا دینی شروع کر دی ہے۔ انہوں نے کہا کہ ججوں کو نئی گاڑیاں مہیا کرنے کا وعدہ پچھلی حکومت نے کیا تھا۔

اٹارنی جنرل نے کہا حکومت ججوں کے مطالبے کو پورا کرنے کی کوشش کر رہی ہے اور پانچ ٹیوٹا پریڈو جیپیں خریدنے کا آرڈر دے چکی ہے۔

ہائی کورٹ کے رجسٹرار سلویسٹر کلمبیرا نے کہا کہ ججوں کے زیر استعمال گاڑیوں کی حالت بری ہے اور وہ آئے دن خراب رہتی ہیں۔

ججوں کے ترجمان کا کہنا ہے کہ وزارت انصاف کو بار بار ججوں کے مطالبے سے آگاہ کیا گیا تھا لیکن جب حکومت نے ججوں کے مطالبے پر کان نہ دھرے تو ججوں کے پاس ہڑتال کے علاوہ کوئی چارہ نہیں تھا۔

ججوں نے کہا کہ ان کی ہڑتال اس وقت تک جاری رہے گی جب تک ان کے مطالبے پورے نہیں ہو جاتے۔

ملاوی سے بی بی سی کے نامہ نگار نے بتایا ہے کہ جج ہائی کورٹ کی عمارت میں موجود رہے لیکن انہوں نے سارا دن کوئی عدالتی کام نہیں کیا اور اخباروں کا مطالعہ کرتے رہے۔

ہڑتال پر جانے والے ججوں میں سے ایک نے بتایا ہے کہ جب بھی کوئی نیا وزیر بنایا جاتا ہے تو اس کے حلف اٹھانے کے ساتھ ہی مہنگی کاروں کا ایک کارواں اس کے زیر استعمال ہوتی ہیں جبکہ ججوں کے زیر استعمال ٹیوٹا کرولا گاڑیاں دس سال پرانی ہیں۔

ہائی کورٹ کے رجسٹرار نے بتایا ہے کہ شروع میں ججوں کا مطالبہ تھا کہ حکومت ان کے لیے مرسیڈیز یا بی ایم ڈبلیو کاریں خریدے لیکن حکومت کے مطالبے پر وہ ٹیوٹا پریڈو جیپیں پر راضی ہو گئے لیکن حکومت وہ بھی نہیں دے رہی ہے۔

ججوں کے ترجمان رجسٹرار ہائی کورٹ نے بتایا ہے کہ وہ سوموار کے روز اٹارنی جنرل سے ملیں گے تاکہ مسئلے کا کوئی حل نکل سکے۔