ایک بیان میں انہوں نے کہا کہ ’دولتِ مشترکہ کے وزراء کو اس بات پر تشویش ہے کہ صدر مشرف نے شروع میں جو وعدہ کیا تھا (کہ وہ 31 دسمبر سے قبل وردی اتار دیں گے) وہ پورا نہیں کیا۔

دولتِ مشترکہ نے انیس سو ننانوے میں نواز شریف حکومت کے خاتمے اور اقتدار پر فوج کے قبضے کے بعد پاکستان کی رکنیت معطل کر دی تھی لیکن اس سال مئی میں پاکستان کو دوبارہ دولتِ مشترکہ میں شامل کر لیا گیا تھا۔

اس وقت دولتِ مشترکہ کی طرف سے کہا گیا تھا کہ وہ پاکستان میں اصلاحات کے عمل کی نگرانی کرے گی اور یہ کہ ’اسے توقع ہے کہ اس سال کے آخر تک صدر مشرف فوج کے سربراہ کے عہدے سے الگ ہو جائیں گے۔‘

اپنے بیان میں ڈان میکنن نے کہا ’ ہم اس بات سے آگاہ ہیں کہ اس فیصلے سے پاکستانی قوم تقسیم ہو گئی ہے۔ دولتِ مشترکہ کی وزراتی کونسل کے ارکان جنہوں نے پہلے بھی اس پر غور کیا تھا، وہ اس معاملے کو اس بنیاد پر دوبارہ پرکھنا چاہیں گے کہ جنرل مشرف کا اعلان اس فیصلے کا حصہ نہیں ہے جس کا اشارہ انہوں نے چھ ماہ پہلے دیا تھا۔‘