یاک شیراک: اخباری نمائندوں کے مطابق انہوں نے عیاد علاوی کے ساتھ ’بے اعتنائی` برتی۔

یورپی یونین کے ایک اجلاس کے دوران دونوں رہنماؤں کو ملنا ہے لیکن خبر یہ کہ یاک شیراک اب اس اجلاس میں شرکت نہیں کریں گے۔

جب ان سے پوچھا گیا تو صدر شیراک نے کہا کہ کچھ پیشگی مصروفیات کی وجہ سے وہ اجلاس میں شرکت نہیں کریں گے۔

یاد رہے صدرشیراک عراق پر حملہ کے فیصلے کو شدید تنقید کا نشانہ بناتے رہے ہیں۔

عراق کے عبوری وزیراعظم عیاد علاوی ان دنوں بلجیم کے دارالحکومت برسلز میں ہیں۔ انہوں نے یورپی یونین کے اجلاس کے شرکاء کے ساتھ ایک ظہرانے میں مہمانِ خصوصی کی حیثیت سے شرکت کرنا ہے۔

اخباری نمائندوں کا کہنا ہے کہ یاک شیراک کا رویہ عیاد علاوی کی طرف ان کی بےاعتنائی کا واضع اظہار ہے۔

دریں اثناء عیاد علاوی نے چند ممالک کو ’تماش بین` ملکوں کا نام دیا ہے اور ان سے کہا ہے وہ عراق کی تعمیِر نو میں بڑھ چڑھ کر حصہ لیں۔

ہالینڈ کے وزیرخارجہ نے اس بات کی تردید کی ہے صدر شیراک نے عیاد علاوی کے ساتھ بےرخی برتی ہے۔ ان کا کہنا ہے ’میرے خیال میں کرنے کا کام یہ ہے کہ ہم مستقبل کی جانب دیکھیں اور ماضی کو بھول جائیں‘۔

لیکن برسلز میں بی بی سی کے نمائندے، ولیم ہورسلی، کا خیال ہے کہ عراق پر حملہ کے معاملے میں یورپی یونین کے ارکان منقسم ہیں اور یہ بات جمعہ کے دن شروع ہونے والی کانفرنس کو خطرے میں ڈال سکتی ہے۔

یورپی یونین نے عراق کے لیے ایک امدادی پیکج کی منظوری دینا ہے جس کے تحت عراقی وکلاء، پولیس اور انتخابی عملے کو تربیت دی جائے گی۔ امداد کی مالیت صرف تیس ملین یورو ہے جو کہ یورپی معیار کے مطابق بہت کم ہے۔

اٹلی کے وزیراعظم سے اپنی ملاقات کے بعد عیاد علاوی نے ایک بار پھر عراق کی تعمیر نو میں بھرپور حصہ لینے کی اپنی درخواست پر زور دیا ہے۔