زخمی ہونے والے کئی افراد کو ایلات کے ہسپتال میں لایا گیا ہے

پہلا دھماکہ جزیرہ نما سینا میں واقع مصر کے قصبے طابا کے ایک ہوٹل میں ہوا۔

طابا بحیرہ احمر میں واقع اسرائیلی سیاحتی مرکز ایلات کے قریب ہی واقع ہے۔

مصری پولیس کے مطابق دھماکے میں 30 اسرائیلی ہلاک اور سو کے قریب زخمی ہوئے ہیں۔

اسرائیلی فوج کے مطابق دھماکہ ایک کار بم کے ذریعے کیا گیا۔ اس سے پہلے کہا گیا تھا کہ دھماکہ گیس سلنڈر پھٹنے کا نتیجہ ہو سکتا ہے۔

ہلٹن ہوٹل اسرائیلی سیاحوں میں مقبول ہے

گزشتہ ماہ سکیورٹی حکام نے اسرائیلیوں کو خبردار کیا تھا کہ وہ اس علاقے میں جانے سے اجتناب کریں کیونکہ ہوسکتا ہے کہ شدت پسند اسے نشانہ بنائیں۔

اسرائیلی ریڈیو کے مطابق دھماکے میں زخمی ہونے والے کئی افراد کو ایلات کے ہسپتال میں لایا جارہا ہے۔

اطلاعات کے مطابق دوسرا دھماکہ مصر کے ایک اور سیاحتی مرکز نیوبا میں ہوا جو طابا اور شرم الشیخ کے درمیان واقع ہے۔

تیسرا دھماکہ مصری قصبے راس الشیطان میں ہوا۔

نیوبا اور راس الشیطان میں ہونے والے دھماکوں کے بارے میں تفصیلات کا انتظار ہے۔

اسرائیلی وزارت خارجہ کے ایک ترجمان کے مطابق حکام اسرائیلی سیاحوں کو واپس لانے کے لیے بسوں مصر بھیجنے کا ارادہ رکھتے ہیں۔

خیال کیا جاتا ہے کہ کم از کم دس ہزار اسرائیلی اس وقت بھی جزیرہ نما سینا میں موجود ہیں۔