 |  پیغام میں تصاویر تو نہیں البتہ کمپیوٹر کو تقصان پہنچانے والا وائرس ہے |
ماہرین نے ایک نئے کمپیوٹر وائرس کے بارے میں متنبہ کیا ہے جس میں یہ پیغام دیا جاتا ہے کہ فائل میں اسامہ بن لادن کی خودکشی کی تصاویر موجود ہیں۔ کمپیوٹر سکیورٹی کے ادارے سوفوز کا کہنا ہے کہ یہ وائرس ہزاروں ای میل گروپس کے لیے پیغامات میں رکھا گیا ہے۔ یہ ای میل کمپیوٹر استعمال کرنے والے کو پیغام کھولنے کا کہتا ہے۔ فائل میں یہ نیا وائرس موجود ہے جو کمپیوٹر کے سوفٹ ویئر میں جا گھستا ہے۔ پیغام میں یہ دعوٰی کیا گیا ہے کہ سی این این چینل کے صحافیوں کو بن لادن کی لاش ملی تھی جو گلے میں پھندے کے ساتھ لٹکی ہوئی تھی۔ اس پیغام میں ایک ویب سائیٹ ڈاؤن لوڈ کرنے کی فائل ہوتی ہے جس میں پیغام کے مطابق اسامہ کی تصاویر موجود ہیں۔ لیکن یہ کمپیوٹر کو نقصان پہنچانے والی فائل ہے جس میں تصاویر تو نہیں دکھائی جاتیں البتہ یہ کمپیوٹر کے سسٹم میں گھس کر وائرس بھیجنے والے کے لیے جاسوسی کا کام سر انجام دیتا ہے۔ سوفوز کے سینیئر اہلکار گراہم گلولی کے مطابق ’ کمپیوٹر ہیکرز اور وائرس بھیجنے والے ہر طرح کے ہتھکنڈے استعمال کریں گے کہ تاکہ لوگ یہ فائل کھولنے پر مجبور ہوجائیں۔ اور یوں معلوم ہوتا ہے کہ اس دفعہ ہیکرز نے عوام کی دلچسپی کو مد نظر رکھتے ہوئے بن لادن کی تصاویر کا ہتھکنڈا استعمال کیا ہے‘۔ | 
یہ صفحہ دوست کو ای میل کیجیئے
پرِنٹ کریں
