یاسر عرفات کے خلاف پہلی بار کھل کر مظاہرہ ہوا ہے

موسیٰ عرفات فلسطینی رہنما یاسر عرفات کے قریبی رشتہ دار ہیں۔ یاسر عرفات کی جماعت الفتح سے مسنلک شدت پسند گروہ الاقصیٰ شہداء بریگیڈ کے کارکنوں نے اتوار کے روز رفاہ کے شہر میں فلسطینی ملٹری انٹیلیجنس کی عمارت پر حملہ کردیا۔

اس حملے میں بارہ افراد زخمی ہوگئے۔ہسپتال کے ذرائع کا کہنا ہے کہ چند زخمیوں کی حالت سنگین ہے۔ جب سے فلسطینی رہنما یاسر عرفات نے اپنے رشتہ دار موسیٰ عرفات کی سیکیورٹی چیف کے عہدے پر تقرری کی ہے غزہ کی پٹی میں فلسطینیوں نے مظاہرے کیے ہیں۔

غزہ میں بی بی سی کے نامہ نگار کا کہنا ہے کہ شدت پسند موسیٰ عرفات کو کرپٹ سمجھتے ہیں لیکن ان کا اہم مطالبہ یہ ہے کہ یاسر عرفات فلسطینی انتظامیہ میں بڑے پیمانے پر پھیلی ہوئی بدعنوانیوں اور کرپشن کا جڑ سے خاتمہ کرے۔

موسیٰ عرفات نے کہا ہے کہ وہ ’ممکنہ دشمنوں‘ کے خلاف لڑنے کے لیے تیار ہیں اور مظاہروں کو نظرانداز کرینگے۔ انہوں نے کہا: ’میں اپنا آرڈر ہِز ایکسیلنسی صدر یاسر عرفات سے لیتا ہوں۔‘

ان کا کہنا تھا کہ ’جس نے میری تقرری کی ہے وہی مجھے عہدہ چھوڑنے کو کہہ سکتا ہے۔‘ موسیٰ عرفات نے واضح کیا ہے کہ وہ اپنا عہدہ نہیں چھوڑیں گے۔

اس بحران کی وجہ سے فلسطینی وزیراعظم احمد قریع نے استعفی دے دیا ہے لیکن یاسر عرفات نے ان کا استعفی قبول کرنے سے انکار کردیا ہے۔