عمر آفریدی بی بی سی اردو ڈاٹ کام، لندن

ایشڈن ایوارڈز کی تقریب لندن میں جمعرات کی شام منعقد ہوئی

ایشڈن ایوارڈز کی تقریب لندن میں جمعرات کی شام منعقد ہوئی۔

ان ایوارڈز کے لیے پاکستان سے دو منصوبوں کا انتخاب کیا گیا تھا۔ ایک منصوبہ ضلع چترال میں آغا خان رورل سپورٹ پروگرام کے تعاون سے زیر عمل ہے جس کے تحت مقامی آبادی اپنی مدد آپ کے تحت چھوٹے جنریٹر لگا کر بجلی کی ضرورت کو پورا کرتی ہے۔ ایوارڈ اے کے آر ایس پی کے معراج خان نے وصول کیا۔

دوسرا منصوبہ لاہور کی ایسکورٹ فاؤنڈیشن کی نگرانی میں چھانگا مانگا کے اطراف دیہات میں زیر عمل ہے۔ اس منصوبے کے تحت لوگوں کو کفایتی چولہے تیار کرنے میں مدد دی گئی ہے۔ اس چولہے میں کم لکڑی جلا کر زیادہ کھانا پکایا جا سکتا ہے۔ ایوارڈ ایسکورٹ فاؤنڈیشن کی آمنہ قریشی اور میسون ضمیر نے وصول کیا۔

انڈیا سے تین منصوبوں کو فائنل مقابلے میں شامل کیا گیا تھا جن میں سے دو کو پہلے انعام کا حقدار قرار دیا گیا۔

ان میں سے ایک آرور منصوبہ ہے جو بھارت میں سورج کی روشنی سے بجلی پیدا کرنے کے لئے شمسی آئینے یا سولر پینلز بغیر نفع نقصان کی بنیاد پر فراہم کرتا ہے۔ ایوارڈ ہیمنت لامبا نے وصول کیا۔

جبکہ دوسرا منصوبہ پریکراتک سوسائٹی کے تحت راجھستان میں زیر عمل ہے اور یہ گوبر سے گیس پیدا کرنے میں مقامی آبادی کی معاونت کر رہا ہے۔ یہ ایوارڈ ڈاکٹر گووردھن راٹھور نے وصول کیا۔

انڈیا سے ایک اور منصوبہ بھی آخری مرحلے تک پہنچا تھا جسے ساڑھے سات ہزار پاؤنڈ کے انعام کر حقدار قرار دیا گیا۔ یہ منصوبہ آئی ٹی پاور کے تحت زیر عمل ہے اور اس کا مقصد روایتی پن چکیوں کی ترقی ہے۔

بھارت اور پاکستان کے علاوہ کینیا اور گواتے مالا سے بھی آخری مرحلے کے لیے ایک ایک منصوبہ کا انتخاب کیاگیا تھا جو رنرز اپ رہے۔