علاقے میں جنگ بندی کے باوجود جھڑپیں جاری ہیں

یہ تازہ جھڑپ امریکہ اور شیعہ رہنما مقتدیٰ الصدر کی مہدی آرمی کے درمیان ہونے والی جنگ بندی اور شہر میں عراقی پولیس کا گشت شروع ہونے کے چند ہی دنوں بعد ہوئی ہے ـ لڑائی بدھ کی رات شروع ہوئی اور جمعرات کی صبح تک جاری رہی ـ

ہلاک ہونے والوں میں پولیس والے، مزاحمت کار اور دو شہری شامل ہیں جبکہ انتیس لوگ زخمی ہوئے ہیں ـ

عراقی پولیس کا کہنا ہے کہ اس جھڑپ میں امریکی فوجی ملوث نہیں تھے ـ

نجف میں لڑائی اس وقت شروع ہوئی جب عراقی پولیس نے ایک بس سٹاپ کے قریب مبینہ چوروں کو پکڑنے کی کوشش کی ـ

اس کے بعد نقاب پوش افراد نے قریبی پولیس سٹیشن پر حملہ کر دیاـ لڑائی اس وقت شدید ہو گئ جب مزاحمت کاروں نے دوسرے پولیس سٹیشن پر بھی قبضہ کر لیاـ

امریکہ کے تعینات کردہ نجف کے گورنر نے دھمکی دی ہے کہ اگر علاقے میں تشدد کے واقعات ہوتے رہے تو موجودہ جنگ بندی نہیں چلے گی ـ

اس کے علاوہ بغداد میں بدھ کے روز ایک حملے میں زخمی ہونے والا امریکی فوجی ہلاک ہو گیا ہے ـ