قیدی کو سزا کے طور پر ایک سو دس والٹ بجلی کے جھٹکے دیے گئے

یہ بدسلوکی بغداد کے ایک عارضی قید خانے میں اپریل کے دوران کی گئی۔ یہ واقعات ابو غریب جیل میں عراقیوں کے ساتھ غیر انسانی سلوک کے دیگر واقعات منظر عام پر آنے کے چند ماہ بعد کی گئی ہے۔

انیس سالہ اینڈریو سٹنگ اور جیریمی ٹریفنی دونوں کو جیل ہوگئی ہے۔

فوج کے بیان کے مطابق ان دونوں نے دیگر دو فوجیوں کے ہمراہ محمدیہ جیل میں ایک قیدی کو سزا کے طور پر ایک سو دس والٹ بجلی کے جھٹکے دیے۔ اس کا جرم یہ تھا کہ اس نے اپنے سیل سے باہر کوڑا پھینکا اور اونچی آواز میں بولا تھا۔

دونوں فوجیوں کو برطرف کردیا گیا ہے جبکہ دو کے خلاف عدالتی کارروائی کا انتظار ہے۔

دریں اثناء ایک اور عراقی قیدی کو اس کی موت کے سات ماہ بعد بالآخر دفنادیا گیا ہے۔ یہ وہ قیدی تھا جو لاپتہ ہوگیا تھا۔

ایک مسکراتے امریکی فوجی کے ساتھ پلاسٹک میں لپٹی اس کی لاش کی تصاویر چند دن پہلے جاری کی گئی تھی۔

ایک فوجی نے بتایا کہ اس شخص کو حراست میں لینے کے اڑتالیس گھنٹے کے اندر ہی مار مار کر ہلاک کردیا گیا تھا۔