ایک عراقی کے ساتھ بدسلوکی کرتے ہوئے امریکی فوجی

جریدہ نیویارکر کا کہنا ہے کہ بغداد کے باہر واقع ’ابو غریب‘ نامی جیل میں قیدیوں کے ساتھ امریکی فوجیوں کی مبینہ بدسلوکی کے بارے میں امریکی فوج کی ایک اندرونی رپورٹ کی نقل حاصل کر لی گئی ہے۔

بتایا جاتا ہے کہ اس رپورٹ میں عراقی قیدیوں کے ساتھ امریکی فوج کی زیادتیوں کے متعدد واقعات کی تفصیلات درج ہیں۔ جس میں مجرمانہ حملوں اور زدوکوب کے واقعات بھی شامل ہیں۔

ادھر برطانوی فوج جو عراق میں تعینات ہے، انہوں نے برطانوی اخبار ڈیلی مرر میں شائع ہونے والی ان تصویروں کے بارے میں شبہات کا اظہار کیا ہے جس میں برطانوی فوجیوں کو عراقی قیدیوں کو مارتے پیٹتے اور ذلیل کرتے دکھایا گیا ہے۔

ایک تصویرمیں ایک برطانوی سپاہی کو ایک قیدی پر پیشاب کرتے بھی دکھایا گیا ہے۔

ان فوجیوں کا کہنا ہے کہ ان تصاویر میں برطانوی دستہ جس پر الزام لگایا گیا ہے اِس قسم کا سازوسامان استعمال ہی نہیں کرتا ہے۔

اس کے علاوہ اس رپورٹ میں گواہوں کے بیانات اور تصویری شہادتیں بھی درج ہیں۔