ابتدا میں کچھ ارکان نے، خاص طور سے پاکستان نے، قرار داد کے بارے میں تشویش کا اظہار کیا تھا۔

قرارداد کے مطابق اقوام متحدہ کے تمام ارکان پر لازم ہوگا کہ ایسے قوانین بنائیں جن کے ذریعہ دہشت گرد، بلیک مارکٹ کرنے والے، اور ایسے غیر سرکاری اہلکار جیسے بے ایمان سائنس داں وسیع تباہی کے ہتھیار حاصل کرنے، بنانے اور ان کے ناجائز کاروبار سے باز رہ سکیں۔

قرارداد کے مطابق رکن ممالک کو اقدامات کرنے ہونگے کہ تباہی کے ممنوعہ ہتھیاروں کا محاسبہ کریں اور ان کے ناجائز کاروبار کا سراغ لگانے کے انتظامات کریں۔

اس قرارداد میں حکومتوں سے کہا گیا ہے وہ اس طرح کے تمام ہتھیاروں کا حساب رکھیں اور ان کی اسمگلنگ کو روکنے کے لئے سرحدوں پر چیکنگ کے میعار کو بہتر بنائیں۔

قرارداد پر عمل درآمد کی نگرانی کے لئے دو سال کے لئے سلامتی کونسل کی ایک کمیٹی تشکیل کی جائے گی۔تاہم قرارداد میں اس بارے میں کچھ نہیں کہا گیا کہ جو ملک اس پر عمل درآمد نہیں کر پائیں گے ان پر کوئی پابندیاں عائد ہونگی یا نہیں۔