امریکی وزیرِ دفاع نے عندیہ دیا کہ شاید امریکی فوج کا کچھ حصہ عراق میں زیادہ دیر تک رہے۔

واشنگٹن میں بات کرتے ہوئے ڈونلڈ رمز فیلڈ نے کہا کہ عراق میں تشدد کی کارروائیوں میں اضافے کے باوجود عراق کے لئے امریکی منصوبے میں کوئی تبدیلی نہیں آئے گی۔

امریکی وزیرِ دفاع کا یہ بیان ایسے وقت آیا ہے جب عراق میں اتحادی فوج کے مخالف شیعہ اور سنی جنگجوؤں کو کچلنے کے لئے امریکی فوج کا آپریشن جاری ہے جس کے تحت فلوجہ میں ایک مسجد پر بمباری کی گئی۔

امریکی فوج کا کہنا ہے کہ مسجد پربمباری سے ایک عراقی ہلاک ہوگیا۔ اس سے پہلے امریکی فوج کی طرف سے یہ کہا گیا تھا کہ بمباری سے چالیس عراقی مارے گئے ہیں۔

امریکی محکمۂ دفاع پینٹاگون نے بتایا ہے کہ اس جھڑپ میں پانچ امریکی فوجیوں کا نقصان ہوا ہے۔

کئی دنوں سے جاری اس لڑائی میں سو سے زیادہ عراقی ہلاک ہوگئے ہیں جبکہ تیس کے قریب امریکی فوجی مارے گئے ہیں۔

فلوجہ میں ہونے والی اس جھڑپ کے علاوہ رمادی میں بھی جہاں منگل کو بارہ امریکی میرین مارے گئے تھے، امریکی فوج اور اس کے مخالف عراقیوں میں لڑائی کی اطلاعات ہیں۔

رمادی کے شمال میں حویجہ کے مقام پر ایک جھڑپ ہونے کی اطلاع ہے جہاں آٹھ عراقی ہلاک ہوئے ہیں۔

ادھر کربلا میں پولینڈ کی فوج اور مقتدیٰ الصدر کے مسلح حامیوں کے درمیان ایک جھڑپ ہوئی ہے جس میں مقتدی الصدر کے ایک قریبی ساتھی کی ہلاکت کی اطلاع ملی ہے۔

مقتدیٰ الصدر کے حامیوں سے جھڑپ کے بعد عراق کے شمال سے یوکرائن کے فوجی پیچھے ہٹ گئے ہیں۔

شیعہ رہنما آیت اللہ علی سیستانی نے اہلِ تشیع کی مزاحمت کے خلاف امریکی کارروائی کی مذمت کی ہے اور اپیل کی ہے کہ ہر طرف سے دانش مندی اور پرامن طریقے سے معاملات حل کرنے کی کوشش کی جائے۔