چینی حکام نے ابھی تک گرفتاری کی کوئی وجہ نہیں بتائی۔

یہ تینوں ’تھینہ من مدر آرگنائزیشن‘ کی سرگرم اور نمایاں رکن ہیں۔

ان تینوں کے بچے پندرہ سال قبل چار جون کو تیانا مین اسکؤائر میں جمہوریت کے لئے ہونے والے مظاہروں کے دوران اس وقت ہلاک ہو گئے تھے جب پولیس نے مظاہرین پر دھاوا بول دیا تھا۔

تینوں مائیں ہلاک ہونے والے بچوں کے لیے انصاف کی طلب گار ہیں۔

چینی حکام نے ابھی تک ان کی گرفتاری کی کوئی وجہ نہیں بتائی۔

گرفتار شدگان میں نمایاں ستاسٹھ سالہ سابق پروفیسر ڈنگ زیلن ہیں جو ’تھینہ من مدر آرگنائزیشن‘ کی سربراہ ہیں۔ انھوں نے یہ تنظیم اپنے سترہ سالہ بیٹے کی ہلاکت کے بعد قائم کی ۔

ڈنگ کو اتوار کے روز مشرقی چینی شہر ووکسی سے گرفتار کیاگیا ہے۔ جب کہ ان کی دوسری دو ساتھیوں ژانگ زیلنگ اور ہونگ جن پنگ کو بیجنگ سے گرفتار کیا گیا۔

حقوق انسانی کی ایک امریکی تنظیم کا کہنا ہے کہ ان ماؤں نے حالیہ دنوں ایک وڈیو فلم بنائی جسے وہ اقوام متحدہ انسانی حقوق کمیشن جنیوا میں پیش کرنا چاہتی تھیں۔

ڈنگ زیلن کے خاوند کا کہنا ہے کہ چینی حکومت کے خیال میں وہ تیانا مین جمہوریت مظاہروں کی پندرھویں سالگرہ منانے کے ضمن میں پروگرام بنا رہی تھیں جو کہ پندرہ اپریل کو ہے۔