 |  ہلاکتوں اور حملوں کا سلسلہ عراق کے دیگر شہروں میں بھی جاری ہے |
امریکی حکام کے مطابق بغداد کے مغربی علاقے میں سڑک پر نصب کئے گئے ایک بم کے پھٹنے سے ایک امریکی سپاہی اور ایک عراقی مترجم ہلاک ہوگئے ہیں۔ امریکی فوجی حکام نے ایک بیان میں مزید کہا ہے کہ دھماکے سے دیگر تین سپاہی زخمی ہوگئے ہیں۔ اتوار کو بعداد میں امریکی فوج کے صدر دفتر کے نزدیک ایک میزائیل کے گرنے سے ایک عراقی شہری ہلاک ہوگیا تھا۔ اتوار ہی کو بغداد میں ایک پولیس سٹیشن پر بم کے حملے کے نتیجے میں ایک عراقی اہلکار ہلاک اور دو زخمی ہوگئے تھے۔ ہلاکتوں اور حملوں کا سلسلہ عراق کے دیگر شہروں میں بھی جاری ہے۔ اتوار کو فلوجہ کے نزدیک ایک راکٹ حملے میں دو امریکی سپاہی ہلاک ہوگئے۔ صدام حسین کی حکومت کے خاتمے کے بعد سے فلوجہ میں امریکی فوجیوں اور مسلح عراقیوں کے درمیان بے شمار تصادم ہوچکے ہیں۔ بغداد میں قابض افواج کے صدر دفتر پر ماضی میں بھی کئی حملے کئے جاتے رہے ہیں۔ جمعرات کو بغداد میں ایک بم حملے میں دو امریکی فوجی ہلاک ہوگئے تھے۔ اب پیر کی ہلاکتوں کے ساتھ ہی امریکہ میں عراق جنگ کے بعد ہلاک ہونے والے امریکی فوجیوں کی تعداد تین سو چورانوے تک جاپہنچی ہے۔ | 
یہ صفحہ دوست کو ای میل کیجیئے
پرِنٹ کریں
