 |  پاکستانی پولیس |
پاکستانی حکام نے کراچی اور اسلام آباد کے ہوائی اڈوں پر ہنگامی صورتحال کے نفاذ کا اعلان کیا ہے۔ اس اعلان کی کوئی خاص وجہ نہیں بتائی گئی ہے۔ کراچی میں موجود بی بی سی کے نامہ نگار ادریس بختیار کے مطابق یہ اقدام اسی کارروائی کی کڑی ہے جس کے تحت پاکستانی فوج نے مشتبہ غیرملکی دہشت گردوں کے خلاف پاک افغان سرحد کےقبائلی علاقوں میں فوجی آپریشن شروع کر رکھا ہے۔ حکام کے مطابق اس اقدام کے تحت، ملک کے دونوں اہم بین الاقوامی ہوائی اڈوں پر حفاظتی انتظامات سخت تر کر دیئے گئے ہیں۔ یہ ہنگامی صورتحال آئندہ تین روز تک جاری رہے گی۔ جس کے دوران نیم فوجی دستے ائیرپورٹ کے سیکورٹی اہل کاروں کی معاونت کریں گے۔ اور ہوائی اڈوں پر موجود گاڑیوں کی پارکنگ کے احاطوں اور جہازوں کو کھڑے کرنے کے مقامات کی کڑی نگرانی کی جاۓ گی۔ اس دوران کسی بھی قسم کی ہنگامی صورتحال سے نبٹنے کے لیئے دونوں ہوائی اڈوں پر خصوصی انتظامات کیئے گۓ ہیں۔ جس کے تحت وقتی طور پر جاری کیے گۓ داخلہ پاسوں کی بھی جانچ کی جاۓ گی۔ یاد رہے کے اس کڑی نگرانی سے وہ سرکاری حکام بھی مستثنیٰ نہیں ہوں گے جنہیں پروٹوکول کے اعتبار سے حساس علاقوں میں جانے کی اجازت دی گئی ہو۔ اس تمام کارروائی کی ابھی تک حکام نے کوئی وضاحت نہیں کی ہے۔ لیکن انہی انتظامات پر تبصرہ کرتے ہوۓ ہوائی اڈوں کی سیکورٹی سے منسلک ایک اہل کار نے کہا کےیہ انتظامات بلاجواذ نہیں کئے جا رہے ہیں۔ | 
یہ صفحہ دوست کو ای میل کیجیئے
پرِنٹ کریں
