سارک ممالک کے رہنما

کراچی میں ہونے والی تین روزہ سارک لا کانفرنس کے اختتام پر ساتوں ممالک کے چیف جسٹس صاحبان نے ’اعلانِ کراچی‘ پر دستخط کئے ہیں جس میں کہا گیا ہے کہ سارک ممالک میں موثر عدالتی معاونت کے ذریعے قانون کی بالادستی کو مستحکم بنانے کے ساتھ اہلیت کو اولیت دی جائے گی ۔تاکہ ہر طرح کے امتیاز، بدعنوانی اور جانب داری کا خاتمہ کیا جا سکے۔

اعلامیہ میں کہا گیا ہے کہ مشترکہ اور موثر کوششوں سے مقدمات کے فیصلوں میں تاخیر کو دور کیا جا ئے گا ، سارک ممالک کی عدالتوں کے طریقۂ کار کو بہتر بنایا جا ئے گا اور مقدمات کی تیزی سے بڑھتی ہوئی تعداد کے لئے وسائل کو بہتر طور پر استعمال کرنے کی غرض سے عدلیہ کے طریقۂ کار کی تشریحِ نو کی جائے گی۔

اعلانِ کراچی میں یہ بھی کہا گیا ہے کہ سارک ممالک میں با صلاحیت اور آزاد ججوں کے انتخاب کو یقینی بنایا جائے گا ، عدالتوں پر مقدمات کے بوجھ کا جائزہ لینے کے ساتھ عدالتوں کی تعداد میں باضافہ کیا جائے گا اور جوڈیشل اکیڈمیاں تشکیل دی جائیں گی تاکہ مقدمات نمٹانے کے لئے ججوں کی پیشہ وارانہ اہلیت کو بہتر بنایا جا سکے ۔

کراچی اعلان پر دستخط کرنے والوں میں بنگلہ دیش کے چیف جسٹس سید جے ار مدثر حسین، بھوٹان کے چیف جسٹس لیو نپو سونم ٹونگئے ، بھارت کے جسٹس آر سی لاہوٹی، مالدیپ کے چیف جسٹس محمد رشید ابراھیم ، نیپال کے چیف جسٹس گووند بہادر شریستھا ، پاکستان کے چیف جسٹس ناظم حسین صدیقی اور سری لنکا کے چیف جسٹس سرتھ این سلوا شامل ہیں