قابض افواج کے ساتھ تعاون کرنے والوں کو نشانہ بنایاجا رہا ہے

یہ دھماکہ بغداد میں ملک کی نئی فوج کے لئے قائم بھرتی دفتر کے باہر اس وقت ہوا جب سینکڑوں عراقی وہاں موجود تھے۔

اس سے قبل منگل کوبھی ایسے ہی ایک دھماکے میں جو ایک پولیس سٹیشن کے باہر ہوا تھا، تقریباً پچاس افراد ہلاک ہوئے تھے۔

عراق میں حالیہ دھماکے فروری 10: اسکندریہ میں پولیس سٹیشن پر کار بم دھماکہ 35 ہلاک، فروری 1: کرد شہر اربیل میں عید کے موقع پر دو خود کش بم دھماکے 100 ہلاک، جنوری 18: امریکی ہیڈ کوارٹرز کے باہر دھماکہ 18 ہلاک، دسمبر 14: خالدیہ، بغداد میں پولیس سٹیشن کے باہرکار بم دھماکہ 17 ہلاک۔

پچھلے چوبیس گھنٹوں میں عراق میں دو بڑے دھماکوں سے ملک میں سیکورٹی کے حالات مزید خراب ہوگئے ہیں اور بی بی سی کے نامہ نگاروں کا کہنا ہے کہ عراق میں قائم کئے جارہے نئے اداروں کے لئے یہ خاصہ بڑا دھچکہ ہے۔

منگل کے روز ہونے والے دھماکے کا ٹارگٹ بھی ایک پولیس سٹیشن تھا۔ یہ دھماکہ بغداد کے جنوب میں چالیس کلومیٹر دور سکندریہ کے قصبے میں ایک پولیس سٹیشن کے باہر کھڑی گاڑی میں ہوا تھا جس میں پچاس افراد ہلاک اور ڈیڑھ سو زخمی ہوگئے تھے۔

دھماکہ اس قدر شدید تھا کہ تھانے اور برابر میں واقع عدالتی عمارت کو بھی نقصان پہنچا۔

عراق کی نئی پولیس فورس کے جو امریکہ نے قائم کی ہے اب تک تین سو سے زیادہ اہلکاروں کو شدت پسندی کا نشانہ بنایا گیا ہے۔

بی بی سی کے نامہ نگار کا کہنا ہے کہ ہو سکتا ہے کہ کل ہونے والا حملے میں وہ عناصر ملوث ہوں جو کہ شیعہ اکثریتی کو ہتھیار اٹھانے پر مجبور کر رہے ہیں۔

پیر کے دن امریکی حکام نے عراق میں شیعہ سنی فساد شروع کرانے کی ایک سازش کا انکشاف کیا تھا۔