ادارے نے خوراک میں قلت کا ذمہ دار فنڈز میں کمی کے بحران کو ٹھہرایا ہے اور کہا ہے کہ دو ماہ بعد ساٹھ لاکھ سے زیادہ لوگوں کو ہنگامی طور پر ملنے والی خوارک بھی مہیا نہیں ہو سکے گی۔

مبصرین کہتے ہیں کہ عالمی ادارے کا پیغام بالکل واضح ہے اور وہ یہ کہ اپریل میں خوراک کی نئی رسد پہنچنے تک شمالی کوریا کے لئے امدادی خوراک دستیاب نہیں ہوگی۔

پیانگ یانگ میں عالمی ادارہ برائے خوارک کے ایک نمائندے مسعود حیدر نے بتایا ہے کہ اس وقت خوراک کے ذخیرہ کے یہ حالت ہے کہ جب بچا کھچا رہ گیا ہے وہ صرف ان افراد کو دیا جا رہا ہے جو انتہائی مستحق ہیں۔

اگلے دو ماہ تک تقریبا ایک لاکھ افراد کو خوراک دی جا سکے گی اور ترجیح ان عورتوں کو ہو گی جو بچہ پال رہی ہوں یا پھر ہسپتال میں داخل بچوں کو یا یتیم خانوں میں موجود بچوں کو خوراک دی جائے گی۔

اس کا مطلب یہ ہے کہ شمالی کوریا کی آبادی کے ایک چوتھائی حصے کو جنہیں عالمی ادارے کی طرف سے خوراک ملتی ہے، موجودہ موسمِ سرما عام طور پر ملنے والی خوراک سے بھی کم خوراک پر گزارنا ہوگا۔

مسعود حیدر کا کہنا تھا کہ اس صورتِ حال سے صرف انسانی اذیت میں اضافہ ہوگا۔ ان کا کہنا تھا کہ موجودہ صورتِ حال کا سبب مخصوص سیاسی حالات ہیں جس سے شاید ان کا اشارہ شمالی کوریا کے جوہری پروگرام کی طرف تھا۔