یہ صفحہ دوست کو ای میل کیجیئے		پرِنٹ کریں

خلیج گوانتانامو میں امریکہ کی فوجی جیل میں قید تین قیدیوں کو جن کی عمریں تیرہ سے لے کر پندرہ سال تک بتائی جاتی ہیں رہا کر دیا گیا ہے۔

یہ تینوں ایک سال تک جیل میں رہے۔ ان کو ان کے ملک روانہ کر دیا گیا لیکن ملک کا نام نہیں بتایا گیا۔

یہ تینوں گوانتانامو جیل کے کم عمر ترین قیدی سمجھے جاتے تھے اور ان پر طالبان کی حمایت کا الزام تھا۔

بغیر کسی عدالتی کارروائی کے ان کو قید میں رکھنے پرامریکی حکومت کو انسانی حقوق کے اداروں کی طرف سے سخت تنقید کا سامنا کرنا پڑا تھا۔

امریکہ کے محکمہ دفاع نے ایک بیان میں کہا کہ امریکہ کو ان تینوں لڑکوں سے اب کوئی خطرہ نہیں اور نہ ہی ان سے پوچھ گچھ کی ضرورت ہے۔

گوانتانامو کی جیل میں چھ سو سے زیادہ افراد بغیر کسی مقدمے کے افغانستان پر امریکی حملے کے بعد سے قید ہیں۔

اب تک ستاسی افراد کو رہا کیا جا چکا ہے۔ چار افراد کو سعودی عرب منتقل کیا گیا ہے۔

پینٹاگون نے کہا ہے کہ جمعرات کو رہاہونے والے لڑکوں کے نام ان کی سلامتی کی خاطر نشر نہیں کئے جائیں گے۔

پینٹاگون نے کہا کہ غیر سرکاری تنظیموں کی مدد سے ان تینوں لڑکوں کو نئی زندگی شروع کرنے میں مدد دی جائے گی۔