یہ صفحہ دوست کو ای میل کیجیئے		پرِنٹ کریں

مہلک ہتھیاروں کی تلاش جاری ہے

عراق میں وسیع پیمانے پر تباہی پھیلانے والے ہتھیاروں کو تلاش کرنے والی ٹیم کے سربراہ ڈیوڈ کے نے اپنے عہدے سے استعفیٰ دے دیا ہے۔

انہوں نے کہا ہے کہ ان کے خیال میں عراق میں کیمیائی یا جراثیمی ہتھیار بڑی تعداد میں موجود نہیں۔

ڈاکٹر کے نے یہ بھی کہا کہ وہ نہیں سمجھتے کے عراق میں انیس سو اکانوے میں خلیج کی پہلی جنگ کے بعد ہتھیار تیار کرنے کے کسی بڑے پروگرام پر کام کیا گیا ہے۔

واشنگٹن میں بی بی سی کے نامہ نگار کے مطابق ڈاکٹر کے نے ایسے وقت میں استعفیٰ دیا ہے جب عراق میں ہتھیاروں کی تلاش بغیر کسی کامیابی کے جاری ہے۔

ّڈاکٹر کے کی جگہ اقوام متحدہ میں اسلحہ کے معائنہ کاروں کی ٹیم کے سابق نائب سربراہ چارلس ڈولفر کو مہلک ہتھیار تلاش کرنے والی ٹیم کا سربراہ تعینات کیا جا رہا ہے۔

چارلس ڈولفر نے گزشتہ ماہ کہا تھا کہ ان کے خیال میں عراق میں کیمیائی یا جراثیمی ہتھیاروں کی تلاش کے امکانات تقریباً معدوم ہو چکے ہیں۔

ڈاکٹر کے کے استعفی پر سی آئی اے کے ڈائریکٹر جارج ٹینٹ نے ان کی تعریف کرتے ہوئے کہا کہ ڈاکٹر کے نے خطرناک اور مشکل صورت حال میں اپنی خدمات پیش کئیں۔

انہوں نے کہا کہ ڈاکٹر کے ایک مثالی شہری ہیں جنہوں نے اپنی مرضی سے حکومت کو اپنی خدمات پیش کئیں۔

سی آئی اے کی طرف سے جاری ہونے والے ایک بیان میں کہا گیا کہ گو کہ ابھی بہت سے سوالوں کے جواب تلاش کرنا باقی ہیں تاہم انہوں نے اس یقین کا اظہار کیا کہ عراق کا سروے گروپ اپنی تمام تر صلاحیت کو بروئے کار لاتے ہوئے ان سوالات کا جواب تلاش کرنے کی کوشش کرئے گا۔

لیکن انہوں نے برطانوی خبر رساں ادارے کو ایک انٹرویو میں کہا کہ وسیع پیمانے پر تباہی پھیلانے والے ہتھیاروں کا کوئی ذخیرہ موجود نہیں ہے۔ انہوں نے کہا کہ ان کے خیال میں پہلی خلیج جنگ کے بعد وسیع پیمانے پر تباہی پھیلانے والے ہتھیاروں کی بڑے پیمانے پر پیدوار نہیں ہوئی ہے۔

ڈاکٹر کے نے کہا کہ عراق سے اب کچھ دستیاب ہونے والا نہیں۔