یہ صفحہ دوست کو ای میل کیجیئے		پرِنٹ کریں

امریکہ کے جوہری سائنسدان سِگفریڈ ہیکر

شمالی کوریا کے دورے سے لوٹنے والے امریکی سائنسدان نے کہا ہے کہ انہوں نےکوئی ایسا ثبوت نہیں دیکھا جس سے یہ ظاہر ہوکہ شمالی کوریا نوکلئیر بم تیار کرنے میں کامیاب ہو گیا ہو۔

نوکلئیر سائنسدان سِگفریڈ ہیکر نے امریکی کانگریس کو بتایا ہے کہ اس دورے پر شمالی کوریا کے حکام کی پوری کوشش تھی کہ وہ ان کو اس بات کا یقین دلا سکیں کہ شمالی کوریا نے نوکلئیر بم تیار کر لیا ہے۔

سگفریڈ ہیکر کی کانگریس کے سامنے دلیل سے شمالی کوریا کے متنازع جوہری پروگرام پر اہم معلومات ملتی ہے۔

ان کا کہنا ہے کہ شمالی کوریا کے حکام ان کو ایک انتہائی خفیہ مقام یونگبیون کے جوہری پلانٹ پر لے گئے اور وہاں ان کو وہ جگہ دکھائی جہاں بین الاقوامی نگرانی میں ایک سال پہلے استعمال شدہ جوہری توانائی کے راڈز کو رکھا گیا تھا۔ ان کو پھر وہ جگہ بھی دکھائی گئی جہاں بقول حکام کے راڈز سے اسلحہ کے معیار کی پلوٹونیم تیار کی جاتی۔

لیکن شگفریڈ ہیکر کو تب بھی یقین نہیں آیا کہ یہ لوگ جوہری بم تیار کر سکے ہیں۔ان کی مزید یقین دہانی کے لئے ان کے میزبانوں نے ان کو ایک کمرے میں بٹھایا اور ان کو ایک بڑا سا لال ڈبہ پیش کیا جس میں بقول ان کے پلوٹونیم تھا۔

سگفریڈ ہیکر کہتے ہیں کہ یہ پلوٹونیم ہی معلوم ہو رہا تھا لیکن پھر بھی ان کا خیال ہے کہ اس وقت شمالی کوریا کے پاس وہ تمام تکنیکی معلومات و مہارت نہیں ہے جو انہیں جوہری بم تیار کرنے کے لئے درکار ہے۔

ڈاکٹر ہیکر کے شمالی کوریا جانے والے اس وفد کے ایک اور رکن جیک پرِچارڈ شمالی کوریا کے لئے امریکی پالیسی پر احتجاج میں پچھلے سال وزارت خارجہ سے مستعفی ہو گئے تھے۔

جیک پرِچارڈ نے بدھ کو روزنامہ ’نیو یارک ٹائمز‘ میں امریکی پالیسی پر سخت تنقید کرتے ہوئے کہا کہ امریکہ اس بحران کو سفارتی طریقے سے حل نہیں کرنا چاہتا بلکہ شمالی کوریا کہ تنہا کرکے برباد کرنا چاہتا ہے۔