یہ صفحہ دوست کو ای میل کیجیئے		پرِنٹ کریں

ڈھاکہ میں امریکہ کے خلاف احتجاجی مظاہرہ

امریکہ نے بنگلہ دیش میں اپنے شہریوں کو متنبہ کیا ہے کہ امریکی تنصیبات کو خطرہ ہے چنانچہ وہ چوکنا رہیں۔ یہ تنبہ امریکہ نے حال ہی میں حاصل ہونے والی خفیہ معلومات کی بنیاد پر جاری کی ہے۔

امریکی دفتر ِخارجہ نے کہا ہے کہ حکام نے دارالحکومت ڈھاکہ میں اپنے سفارتخانے پر سکیورٹی بڑھا دی ہے اور اپنے سفارتکاروں پر بنگلہ دیش جانے کے لئے سفری پابندیاں عائد کردی ہیں۔

ایک سرکاری بیان میں کہا گیا ہے ’بنگلہ دیش میں امریکی شہریوں کو نہایت چوکنا رہنا چاہئیے خاص طور پر ان عوامی مقامات پر جہاں غیر ملکیوں کا زیادہ آنا جانا ہے مثلاً ہسپتال، ہوٹل، عبادت گاہیں اور بازار‘۔

امریکی دفتر ِخارجہ نے یہ بھی کہا ہے کہ امریکی شہری اپنے آپ کو سفارتخانے میں رجسٹر کروالیں تاکہ حفاظتی صورتحال کے بارے میں تازہ ترین اطلاعات انہیں دی جاسکیں۔

گزشتہ ماہ امریکی دفتر ِخارجہ نے ایک بیان جاری کیا تھا جس میں امریکی شہریوں اور امریکی تنصیبات کو خطرے کی بارے میں متنبہ کیا گیا تھا۔

تاہم بنگلہ دیشی حکومت نے ان خطرات کو زیادی اہمیت نہیں دی ہے اور کہا ہے کہ غیر ملکیوں کی حفاظت کے لئے ہر ممکن اقدام کیا جاچکا ہے۔

جولائی دو ہزار تین میں ، ڈھاکہ میں امریکی سفارتخانے نے کہا تھا کہ اسے دھمکیاں دی گئی ہیں کہ بنگلہ دیش میں امریکی اہلکاروں اور شہریوں کو ہلاک کیا جاسکتا ہے۔