یہ صفحہ دوست کو ای میل کیجیئے		پرِنٹ کریں

حکام کا کہنا ہے کہ یہ صحافی طالبان کے پاکستان میں داخل ہونے کی جعلی دستاویزی فلم بنانے میں بھی ملوث تھے

پاکستان میں ایک عدالت نے ہفتہ کے روز دو فرانسیسی صحافیوں کو ویزا پالیسی سے متعلق قوانین کی خلاف ورزی کرنے پر چھ ماہ قید کی سزا سنائی تھی تاہم بعد میں ان کی سزا عارضی طور پر معطل کردی گئی ہے ۔

وکیل دفاع نفیس صدیقی نے سزا سنائے جانے کے فوراً بعد سزا کی معطلی کی درخواست دی تھی جس پر عدالت نے یہ سزا ایک ہفتے کے لئے معطل کردی ہے۔

یہ دونوں صحافی سرکاری اجازت کے بغیر افغانستان کی سرحد سے ملحقہ پاکستان کے علاقے میں سفر کررہے تھے۔

فرانسیسی جریدے ’لا یکسپریس‘ کے نامہ نگار مارک ایپستیں اور فوٹوگرافر ژوں پال گلوتو کو فی کس ایک لاکھ روپے جرمانہ بھی ادا کرنا ہوگا۔

سندھ ہائی کورٹ کی جج نزہت آراء علوی کا کہنا تھا کہ ان افراد نے کوئٹہ کے علاقے میں بغیر اجازت کے سفر کرکے پاکستان کے امیگریشن قوانین کی خلاف ورزی کی ہے۔

پولیس کا کہنا ہے کہ ان صحافیوں کے ویزے انہیں صرف اسلام آباد، کراچی اور لاہور جانے کی اجازت دیتے تھے۔

پاکستانی حکام کا کہنا ہے کہ یہ صحافی طالبان کے پاکستان میں داخل ہونے کی جعلی دستاویزی فلم بنانے میں بھی ملوث تھے تاہم اس الزام پر مقدمہ نہیں چلایا گیا ہے۔

یہ دونوں صحافی عدالت کی سماعت کے بعد کراچی جیل بھیج دیے گئے۔ اب انہیں جیل سے رہائی پانے کے لئے جرمانے کے ایک لاکھ روپے ادا کرنے ہوں گے۔

ان دونوں افراد کو سولہ دسمبر کو کراچی میں گرفتار کیا گیا تھا جس کے بعد انہیں چوبیس دسمبر کو ضمانت پر رہا کردیا گیا تھا۔ ان کے ساتھ ایک پاکستانی صحافی خاور مہدی رضوی بھی تھے۔ خیال ہے کہ وہ بھی حکام کی تحویل میں ہیں۔