یہ صفحہ دوست کو ای میل کیجیئے		پرِنٹ کریں

نئے سال کے دوران موسیقی کے آلات کی صنعت میں تیزی آئے گی

کمپیوٹر مصنوعات بنانے والی کمپنی ایپل نے گانے سننے کے لئے اپنے مقبول ترین آلہ آئی پوڈ کا نیا اور انتہائی چھوٹے سائز کا برانڈ متعارف کروایا ہے جس میں ایک ہزار گانے ریکارڈ کئے جا سکیں گے۔

اِس مِنی آئی پوڈ کی امریکہ میں فروری سے اور اس کے بعد دنیا بھر میں اپریل سے فروخت شروع ہو جائے گی۔

اس موقع پر ایپل کے سربراہ اسٹیو جابز نے بتایا کہ ان کی کمپنی بیس لاکھ آئی پوڈ فروخت کر چکی ہے۔

انہوں نے کہا اس آلہ نے منڈی میں آگ لگا کر رکھ دی ہے۔ ایپل کا فروخت کے اعتبار سے ایم پی تھری ساخت کے پلئیر کی مارکیٹ میں اکتیس فیصد اور آمدن کے اعتبار سے پچپن فیصد حصہ ہے۔

انہوں نے کہا یہ آلہ پانچ رنگوں میں ہوگا۔ یہ نو سنٹی میٹر لمبا اور پانچ سنٹی میٹر چوڑا ہے۔

امریکہ میں اِس آئی پوڈ کی قیمت دو سو انچاس ڈالر ہوگی۔

ماہرین کے مطابق سن دو ہزار چار میں موسیقی کے جدید آلات کی صنعت میں تیزی دیکھنےمیں آئے گی۔