یہ صفحہ دوست کو ای میل کیجیئے		پرِنٹ کریں

		عدنان عادل بی بی سی اردو ڈاٹ کام، اسلام آباد

جمعہ کو سارک ملکوں کے وزراۓ خارجہ نے انسداد دہشت گردی کے اضافی پروٹوکول اور جنوب ایشیائی ملکو ں میں آزادانہ تجارت کے معاہدہ سیفٹا پر دستخط کرنے پر اتفاق راۓ کیا۔

ہندوستان کے وزیر خارجہ یشوت سنہا نے بعد میں ایک پریس کانفرنس میں کہا کہ جوب ہم دلی سے نکلے تو ہمیں اس کی توقع نہیں تھی۔ سیکرٹری خارجہ ششانک نے ان دو معاہدوں کو تاریخی کامیابی قرار دیا ۔

بارھویں سارک سراہ کانفرنس کے موقع پر آج جنوب ایشیائی تنظیم کے سات ملکوں کے وزراۓ خارجہ نے صبح اور سہ پہر دو اجلاس کیے۔

پاکستان کے دفتر خارجہ کے ترجمان مسعود خان نے بتایا کہ وزراء کی بات چیت میں علاقائی تعاون کے لیے تعاون اور ایک دوسرے کو سمجھنے کا جذبہ موجود رہا۔

پاکستان کے ترجمان نے کہا کہ تمام وزراۓ خارجہ نے پاکستان کے وزیر خارجہ خورشید قصوری پر اعتماد کا اظہار کیا اور پاکستان کی مہمان نوازی اور سارک سربراہ کانفرنس کے لیے شاندار اقدامات کی تعریف کی۔

ترجمان نے کہا کہ وزراۓ خارجہ نے امید ظاہر کی کہ سارک کانفرنس کا کامیاب نتیجہ نکلے گا۔

سارک ممالک کے وزرا نے سارک کے سیکرٹری کونسل نے سارک تنظیم پر ایک تفصیلی اور تجزیاتی رپورٹ پیش کی۔ پاکستان کے سیکرٹری خارجہ ریاض کھوکھر نے کل ختم ہونے والے سٹینڈنگ کمیٹی کے اجلاس کی رپورٹ پیش کی۔

ترجمان کے مطابق سٹینڈنگ کمیٹی میں سارک کے سوشل چارٹر پر سربراہ کانفرنس میں دستخط کرنے پر اتفاق کیا گیا اور اسٹینڈنگ کمیٹی نے سارک کے انسداد دہشت گردی کے اضافی پروٹوکول کے متن کو حتمی شکل دی۔

ترجمان کے مطابق سٹینڈنگ کمیٹی آزاد تجارت کے معاہدہ سیفٹا کے متن بھی تیار کرلیا۔ سٹینڈنگ کمیٹی نے سفارش کی کہ سارک کے وزراۓ خارجہ ان معاہدوں پر سربراہ کانفرنس میں دستخط کر سکتے ہیں۔

سارک کے وزرا کی کونسل نے سارک کے خوراک کے تحفظ کے ذخائر پر پیشرفت کا بھی جائزہ لیا۔ اس ضمن میں سارک کے ملکوں میں بھوک ختم کرنے کی نئی تجاویز پر بات کی گئی۔

غربت کے خاتمہ پر کمیشن نے بھی جنوبی ایشیا میں غربت کے خاتمہ پر جامع حکمت عملی بنانے کے لیے اپنی تجاویز پیش کیں۔وزراۓ خارجہ نے اس رپورٹ کی منظوری دی اور کہا کہ سارک ملکوں کے وزراۓ خزانہ غربت کے خاتمہ کے لیے قریبی رابطہ رکھیں گے۔

مثل خان کے ضائع ہونے والے پانی کی گندگی اور اس کے زمین پر اثرات پر شاندار کام پر وزراۓ خارجہ نے سارک یوتھ ایوارڈ براۓ دو ہزار دو مثل خان کو دینے کا فیصلہ بھی کیا۔

ترجمان کے مطابق وزراۓ سارک کے لیے اقوام متحدہ میں آبزرور کے طور پر کم کرنے کے معاملہ پر بھی بات کی اور سارک ملکوں کے عالمی اداروں میں مشترک معاملات پر قریبی تعاون کے طریقوں پر بحث کی۔

جنوبی ایشیائی ملکوں کے درمیان آزادانہ تجارت کےمعاہد سیفٹا کو تاریخی کامیابی قرار دیا جارہا ہے جس پر عمل درآمد دو ہزار چھ سے شروع ہوگا تاہم بنگلہ دیش کے اعتراضات دور کرنے کے لیے اس تاریخ کو دو ہزار نو تک بڑھانے کی شق رکھی گئی ہے۔