ایڈز سے بچاؤ کا عالمی منصوبہ  | | غریب ملکوں میں رہنے والے افراد کو مہنگی ادویات تک رسائی حاصل نہیں ہے۔ | |
ایڈز کے عالمی دن کے موقع پر اقوام متحدہ اور عالمی ادارہ صحت نے دنیا بھر میں ایچ آئی وی سے متاثرہ تیس لاکھ غریب مریضوں کو بیماری سے بچاؤ اور اس کے علاج کے لئے ادویات مہیا کرنے کے منصوبے کا باضابطہ آغاز کیا ہے۔ اس منصوبے پر ساڑھے پانچ ارب ڈالر کی خطیر رقم خرچ ہو گی اور اقوام متحدہ کو امید ہے کہ اسے دو سال کے اندر اندر مکمل کر لیا جائے گا۔ اینٹی وائرل اداویات ایچ آئی وی سے متاثرہ افراد کو ایڈز کا شکار ہونے سے بچا کر انہیں مقابلتاً معمول کی زندگی بسر کرنے کا موقع فراہم کرتی ہیں۔ یہ علاج امیر ملکوں میں تو دستیاب ہے لیکن غریب ملکوں میں رہنے والے افراد کو اس تک رسائی حاصل نہیں ہے۔ ایڈز کے عالمی دن کے موقع پر اپنے پیغام میں عالمی ادارہ صحت کے ڈائریکٹر جنرل لی جانگ ووک نے کہا ہے کہ ایڈز سے بچاؤ اور اس کا علاج اس وقت دنیا بھر کے لئے صحت کے شعبے میں سامنے آنے والا سب سے مشکل چیلنج ہے۔ عالمی ادارے کے ڈائریکٹر جنرل نے کہا کہ اس کی طرف فوری توجہ دینے کی ضرورت ہے۔ اس وقت دنیا بھر میں ایچ آئی وی سے متاثرہ افراد کی کل تعداد چار کروڑ کے لگا بھگ ہے اور روزانہ آٹھ ہزار افراد ایڈز سے متعلقہ بیماریوں کا شکار ہوتے ہیں۔ | 
یہ صفحہ دوست کو ای میل کیجیئے
پرِنٹ کریں
