یہ صفحہ دوست کو ای میل کیجیئے		پرِنٹ کریں

ناروے کے نائب وزیر اعظم نے سری لنکا میں صورت حال کو تشویش ناک قرار دیا

ناروے کے مصالحت کاروں نے اپنی امن کوششیں سری لنکا میں صدر اور وزیر اعظم کے مابین جاری کشمکش کے خاتمے تک معطل کر دی ہیں۔

کولمبو میں سری لنکا کے اعلیٰ حکام اور تامل ٹائیگر باغیوں سے ملاقاتوں کے بعد ناروے کے نائب وزیر اعظم ویدار ہیلگیسن نے کہا کہ مصالحت کار اب صرف اتنا کر سکتے ہیں کہ اس بات کو یقینی بنائیں کہ فریقین جنگ بندی کے معاہدے کی پاسداری کریں۔

انہوں نے خبر دار کیا کہ سری لنکا میں صورت حال کافی تشویش ناک ہے اور کہا کہ سری لنکا قیام امن سے مشروط بین الاقوامی امداد کھو سکتا ہے۔

سری لنکا میں سیاسی بحران اس وقت شروع ہوا جب صدر چندریکا کمارا ٹنگا نے تین اہم وزیر کو برخاست اور ملکی پارلیمان کو معطل کر دیا اور وزیر اعظم رنیل وکراما سنگھے پر الزام لگایا کہ وہ باغیوں کو بہت زیادہ رعائتیں دے رہے ہیں۔