یہ صفحہ دوست کو ای میل کیجیئے		پرِنٹ کریں

مسلسل تھکن کا محسوس ہونا اور گہری نیند کا نہ آنا خطرے کی علامات ہیں

ایک نئی تحقیق سے انکشاف ہوا ہے کہ اگر آپ کو مسلسل تھکن محسوس ہوتی ہے یا سکون بخش گہری نیند نہیں آتی تو سمجھ لیں کہ آپ کو کسی بھی وقت دل کا دورہ پڑ سکتا ہے۔

تحقیق پانچ سو ایسی خواتین سے کیے گئے انٹرویوز کے بعد سامنے آئی ہے جن پر دل کا دورہ پڑ چکا تھا۔

ستر فی صد خواتین نے بتایا کہ دل کا دورہ پڑنے سے پہلے انہیں مسلسل تھکن کا احساس ہوتا تھا جو بڑھتا چلا گیا جب کے اڑتالیس فی صد خواتین کا کہنا تھا کہ دورہ پڑنے سے ایک ماہ پہلے سے گہری نیند کے آرام سے محروم ہو چکی تھیں۔

محققین کا کہنا ہے کہ انہوں نے خواتین کا انتخاب اس لیے کیا ہے کہ اب خواتین میں دل کے امراض کا تناسب بڑھتا جا رہا ہے اور دل کے امراض کا شکار ہو کر مرنے والوں میں خواتین کی تعداد مردوں کے مقابلے میں زیادہ ہے۔

اس تحقیق میں چھیاسٹھ سال کی اوسط عمر رکھنے والی ایسی خواتین کو لیا گیا ہے جنہیں گزشتہ چار سے چھ ماہ کے دوران اس تکلیف سے گزرنا پڑا۔

جب نیند اڑنے لگے تو جان لیں کہ جسم آپ کو خطرے کا اشارہ دے رہا ہے

تحقیق میں شامل خواتین کی اکثریت کا کہنا تھا کہ انہیں بعض اور بیماریاں بھی تھیں لیکن دل کے دورے کے ایک ماہ پہلے سے انہیں خاص طور پر تھکن، بے خوابی اور بے چینی کی شکایات تمام شکایات سے زیادہ ہو گئی تھیں۔