فلم کے عیسیٰ پر بجلی آن گری  | | اداکار جم کاویزل پر اس وقت آسمانی بجلی گری جب شوٹنگ میں مصروف تھے |
میل گبسن کی فلم میں حضرت عیسیٰ کا کردار ادا کرنے والے اداکار جم کاویزل پر شوٹنگ کے دوران آسمانی بجلی گری۔ آسمانی بجلی کے گرنے سے جم کاویزل کے علاوہ فلم کے اسسٹنٹ ڈائریکٹر جان مچلینی بھی متاثر ہوئے۔ فلمساز سٹیو میک اویٹی کے مطابق دونوں افراد شدید طور پر زخمی ہونے سے محفوظ رہے ہیں۔ جب یہ واقعہ پیش آیا اس وقت فلم کے فنکاروں، ہدایت کاروں اور دیگر تیکنیکی عملے پر مشتمل ٹیم روم سے چند گھنٹے کی مسافت پر شوٹنگ میں مصروف تھی۔ اسسٹنٹ ڈائریکٹر جان مچلینی پر اس سے پہلے اٹلی کے شہر مٹیرہ میں شوٹنگ کے دوران بجلی گری تھی جس سے ان کے ہاتھ پر جلنے کے ہلکے زخم آئے تھے۔ فلمساز سٹیو میک اویٹی نے اس واقعہ کا ذکر کرتے ہوئے کہا ہے کہ وہ اس وقت کوئی سو فٹ دور ہوں گاجب وہاں آسمانی بجلی گری اور میں نے کاویزل کے کانوں سے دھواں باہر نکلتے ہوئے دیکھا۔ لاطینی اور آرامی جیسی زبانوں میں بننے فلم دی پیشن آف دی کرائسٹ میں حضرت عیسیٰ کی زندگی کے آخری بارہ گھنٹوں پر توجہ دی گئی ہے۔ اگرچہ اس فلم کی ریلیز اگلے سال ہونا ہے لیکن اس کی ریلیز سے پہلے فلم کے بارے میں تنازعات جنم لینا شروع ہو گئے ہیں۔ امریکہ میں یہودیوں کی کئی تنظیموں نے فلم کو سخت تنقید کا نشانہ بنایا ہے اور کہا ہے کہ اس میں یہودیوں کی کردار کشی کی گئی ہے۔ | 
یہ صفحہ دوست کو ای میل کیجیئے
پرِنٹ کریں
