یہ صفحہ دوست کو ای میل کیجیئے		پرِنٹ کریں

دلیر مہدی عدالت کی اجازت کے بغیر ملک چھوڑ کر نہیں جا سکتے

بھارت کے دارالحکومت دلی کے ہائی کورٹ نے مشہور پنجابی پاپ گلوکار دلیر مہدی کی دس روز کی عبوری ضمانت منظور کر لی ہے۔

اس ضمانت کا مطلب یہ ہے کہ پولیس اب دلیر مہدی کو دو نومبر تک گرفتار نہیں کر سکتی۔

عدالت میں سماعت کے بعد دلیر مہدی کے وکیل آر کے جین نے صحافیوں سے بات کرتے ہوئے کہا کہ عدالت نے دلیر مہدی کو کہا ہے کہ وہ اپنا پاسپورٹ جمع کروا دیں اور تحقیقات کے سلسلے میں پولیس سے تعاون کریں۔

انہوں نے مزید کہا کہ عدالت نے پاپ سنگر کو کہا ہے کہ وہ ملک سے باہر جانے سے پہلے عدالت سے اجازت لیں۔

اب مقدمے کی سماعت شمالی شہر پٹیالہ میں ہو گی جہاں سب سے پہلے مقدمہ درج کروایا گیا تھا۔

اس سے پہلے دلی کی ایک عدالت نے پنجابی گلوکار دلیر مہدی کی قبل از گرفتاری ضمانت کی درخواست کو مسترد کر دیا تھا اور کہا تھا کہ لوگوں کو غیر قانونی طور پر بیرون ملک بھجوانے کے معاملہ میں ان کی زیر حراست تفتیش ضروری ہے۔

یاد رہے کہ پنجاب پولیس نے چند روز پہلے بھارت کے بھنگڑے کے مشہور پاپ گلوکار دلیر مہدی، ان کے بھائی شمشیر سنگھ اور تین دیگر افراد کے خلاف مقدمہ درج کیا تھا۔

ان پر الزام ہے کہ انہوں نے لوگوں کو موسیقی کے طائفوں میں شامل کرکے انہیں باہر بھیجنے کے بہانے لاکھوں روپے ہتھیائے ہیں۔

پولیس نےدلیر مہدی کے بڑے بھائی شمشیر سنگھ کو حراست میں لے لیا تھا۔ دلیر مہدی کے بھائی کے خلاف شکایات تھیں کہ انہوں نے مغربی ممالک بھیجنے کا جھانسہ دے کر کئی افراد کو دھوکا دیا ہے اور ان سے بڑی بڑی رقوم بٹوری ہیں۔

دلیر مہدی نے اس الزام کی تردید کی ہے اور کہا ہے کہ کافی عرصے پہلے ان کا اپنے بھائی سے تعلق ٹوٹ چکا ہے۔